"Тошкент-Термиз" йўналишида ҳаракат вақтинча чекланди

09:19 / 17.09.2023·375·Жамият

"Тошкент-Термиз" йўналишидаги барча автотранспорт воситалари ҳаракати вақтинча чекланди. Бу ҳақда Сирдарё вилояти ҳокимлиги хабар берди.

Қайд этилишича, бугун Оқолтин тумани ҳудудидан ўтувчи Халқаро аҳамиятдаги А-373 автомобиль йўлининг 10 км да жойлашган зовур кўпригининг "Тошкент-Жиззах" йўналишидаги қисмида оралиқ қурилма балкаларининг 5 тасида ёриқ вужудга келиб, чўкиш ҳосил бўлган.

Шу муносабат билан "Тошкент-Термиз" йўналишидаги барча автотранспорт воситалари ҳаракати вақтинча чекланди.

"Ушбу йўналишдаги автотранспорт воситалари ҳаракати халқаро аҳамиятдаги М-34 "Тошкент - Душанбе" автомобиль йўлининг 104-152 километрлари ҳамда А-376 "Қўқон - Жиззах" автомобиль йўлининг 219-242 километрлари орқали ташкил қилинди", - дейилади хабарда.

Айтилишича, барча йўналишларда ЙПХ постлари ташкил қилиниб, ҳаракат хавфсизлигини тўлиқ таъминлаш чоралари кўрилган. Айни вақтда мазкур кўприкда таъмирлаш-тиклаш ишлари олиб борилмоқда.