Мажбурий ижро бюроси Андижон вилояти бошқармасида “Конституция – халқчил давлат, барқарор тараққиёт ва фаровон ҳаёт асоси” мавзуида семинар ҳамда “очиқ эшиклар куни” ташкил этилди. Унда Андижон юридик техникумининг 30 нафарга яқин ўқувчилари иштирок этди.
Тадбир аввалида вилоят бошқармасининг катта инспектори Жамолиддин Одилов янги таҳрирдаги Конституциямизнинг мазмун-моҳияти ва аҳамиятига алоҳида тўхталиб, унинг ҳуқуқий-демократик, кучли фуқаролик жамиятини барпо этиш, халқимизнинг тинч, обод ва фаровон ҳаётини таъминлаш, миллий қонунчилик тизимини шакллантириш ҳамда мамлакатимиз ҳаётининг барча соҳаларида ислоҳотларни муваффақиятли амалга оширишда мустаҳкам ҳуқуқий пойдевор бўлиб хизмат қилишини таъкидлаб ўтди.
Савол-жавоб тарзида ўтказилган семинар ўқувчиларда катта қизиқиш уйғотди ва янги Конституцияга оид нормаларни осон ўзлаштиришига кўмаклашди.
Шунингдек, суҳбат чоғида Бюро органларига хизматга қабул қилиш талаблари бўйича тушунчалар берилди. Ёшларда давлат ижрочиси касбига бўлган қизиқишни уйғотиш, касбий кўникмаларини шакллантириш борасида маслаҳатлар ва тегишли тавсиялар айтиб ўтилди.
Шундан сўнг, ўқувчилар бошқарманинг алоҳида муҳим ижро ишларини ижро этиш, суриштирув ва маъмурий амалиёт шўъбалари, ихтисослаштирилган туманлараро ҳамда Бюронинг Андижон шаҳар бўлими фаолияти билан яқиндан танишдилар.
Тадбир давомида Бюронинг Андижон шаҳар бўлимида ўқувчилар давлат ижрочиларининг кунлик иш фаолияти таништирилиб, уларга ижро ҳужжатлари бўйича ишларни ташкил этиш юзасидан тушунчалар берилди. Ижро иши юритишда “МИБ-портал” электрон дастурининг афзалликлари санаб ўтилди.
Бундан ташқари, ходимларга яратилган имкониятлар ва қулайликлар, ижро жараёнида юзага келадиган низоли ҳолатларга ечим топиш борасида фикр алмашилди.
“Замин” янгиликларини “Telegram”да кузатиб боринг
