Ўзбекистон экологияни асраш бўйича қўшган ҳиссаси учун “Чемпион” унвони билан тақдирланди

^{Фото: Экология вазирлиги ахборот хизмати}
Ўзбекистон экологияни асраш бўйича глобал ҳамкорликни ривожлантиришга қўшган ҳиссаси учун “Чемпион” унвони билан тақдирланди, деб хабар бермоқда Экология вазирлиги ахборот хизмати.

Унга кўра, Самарқанд шаҳрида ўтказилган Ёввойи ҳайвонларнинг кўчиб юрувчи турларини сақлаш тўғрисидаги конвенция иштирокчилари конференциясининг 14-йиғилиши доирасида Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов ва CМS конвенцияси ижрочи котиби Эми Фрэнкэл ўртасида учрашув бўлиб ўтди. Учрашувда “2024–2026 йилларга мўлжалланган экологик алоқалар бўйича глобал ҳамкорлик”ни ривожлантиришга қўшган ҳиссаси учун Ўзбекистонга “Чемпион” унвонини бериш тўғрисида битим имзоланди.

“Табиат чегара билмайди. Бу, айниқса, қуриб қолган Орол денгизи Марказий Осиё ва ундан ташқаридаги аҳоли ва ёввойи табиатга ҳалокатли таъсир қилганидан кейин ўз исботини топган. Атроф-муҳитни муҳофаза қилиш бўйича CМS Глобал Ҳамкорлигига ўз ҳиссасини қўшиш орқали Ўзбекистон кўчиб юрувчи турларни ҳимоя қилиш бўйича глобал саъй-ҳаракатларда иштирок этмоқда. Бу ҳамкорлик табиат халқларни бирлаштира олишига, табиатни муҳофаза қилиш учун халқлар бирлашиши кераклигига ишончимизни мустаҳкамлайди”, — деди Азиз Абдуҳакимов.

Қайд этилишича, Экология билан боғлиқ кун тартиби ҳукуматлар ва халқаро ҳамжамият учун устувор вазифадир. Кунминг-Монреаль Глобал Биологик хилма-хиллик дастурининг кўплаб мақсад ва вазифаларининг асосий компоненти сифатида боғланиш кўчиб юрувчи турларнинг омон қолиши, шунингдек, тикланиш, биологик хилма-хилликни сақлаш ва иқлим ўзгаришига мослашиш учун муҳим аҳамиятга эга. Ушбу мажбурият экологияни асраш бўйича мувофиқлаштирилган саъй-ҳаракатлар ва аниқ натижаларга эришиш учун халқаро ҳамкорликни рағбатлантириш, Атроф-муҳитни муҳофаза қилиш бўйича янги глобал ҳамкорликни (GPES) яратишни қўллаб-қувватлайди.

Учрашув давомида CМS Family сиёсатини ишлаб чиқиш органлари доирасида мавжуд чемпионларни эътироф этиш учун махсус донор тадбирлари ташкил этилаётгани таъкидланди. Сертификат ва тегишли реклама Чемпионларга миллий ва халқаро миқёсда кўчиб юрувчи турларни сақлашга бўлган садоқатини ва қўллаб-қувватлашини тарғиб қилиш имкониятини беради.

Маълумот учун: “Кўчиб юрувчи турларни муҳофаза қилиш бўйича чемпионлар” дастурида бир қанча ташаббуслар илгари сурилган. Уларнинг ҳар бири маълум бир турга, турлар гуруҳига ёки муаммоли масалага қаратилган каттароқ дастурга ҳисса қўшадиган тадбирлар тўпламини ўз ичига олади. Чемпионлар бир ёки бир нечта махсус CМС ташаббуслари учун камида уч йил молиявий мажбурият олишга тайёр ҳукуматлар, компаниялар, ташкилотлар ва шахслар учун очиқдир. “Замин” янгиликларини “Facebook”да кузатиб боринг