Тошкентда қарама-қарши йўлда ҳаракатланган BYD ҳайдовчисига чора кўрилди

^{Фото: Тошкент шаҳар ИИББ ЙҲХБ ахборот хизмати}
Тошкентда хавфли манёврлар содир этиб, қарама-қарши йўналишда ҳаракатланган BYD ҳайдовчиси жавобгарликка тортилди, деб хабар беради пойтахт ИИББ Йўл ҳаракати хавфсизлиги бош бошқармаси.

Ижтимоий тармоқларда 29 февраль куни BYD русумли автомашина ҳайдовчиси, ўзи ва ўзгаларнинг ҳаётини хавф остига қўйиб, қарама-қарши йўлда ҳаракатлангани акс этган видео тарқалди.

Тошкент шаҳар ИИББ ЙҲХБ хабарига кўра, мазкур видео ўрганилиб, ушбу автомашина ҳайдовчиси, 2001 йилда туғилган Б.А.га нисбатан Маъмурий жавобгарлик тўғрисидаги кодекснинг 128-5-моддаси (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) билан маъмурий баённома расмийлаштирилди.

“Ҳайдовчи, унутманг, йўл ўйин майдони эмас. Барча ҳайдовчилардан қоидаларга риоя қилишларини сўраймиз”, — дейилади хабарда.

Маълумот учун Ўзбекистонда 2023 йили 9 839 та йўл-транспорт ҳодисаси содир этилиб, уларда 9 209 нафар фуқаро жароҳатланган ва 2 282 нафар фуқаро ҳалок бўлган. “Замин” янгиликларини “Telegram”да кузатиб боринг