Саудия Арабистонида 100 минг нафаргача ўзбекистонликлар доимий ишга жойлаштирилиши мумкин

^{Фото: Фарғона вилояти ҳокимлиги}
Саудия Арабистонида 100 минг нафаргача ўзбекистонликлар доимий ишга жойлаштирилиши мумкин. Бу ҳақда Фарғона вилояти ҳокимлиги хабар берди.

Маълум қилинишича, Фарғона вилояти ҳокими Хайрулло Бозоров ота-боболари ўзбекистонлик бўлиб, Саудия Арабистонида яшаб келаётган, йирик бизнесга эга тадбиркорлар – Vision Ambassadors ҳамтаъсисчиси Осама Кокандий, Содиқ Ат-Тижория компанияси раҳбари Эмет Абдулазиз ҳамда араб ишбилармон Аҳмад Алхутами билан ҳам учрашди.

Осама Кокандий вилоят раҳбарига паррандачилик соҳасида Фарғонада лойиҳа амалга ошириш режаларини маълум қилди. Эмат Абдулазиз текстиль соҳасида ҳамкорлик қилиш, Фарғонада ишлаб чиқарилаётган маҳсулотларни Саудия Арабистони бозорига олиб киришда ўз таклифларини билдирди. Аҳмад Алхутами билан музокараларда эса тил ва турли касбларга ўқитиш марказлари ташкил этиш ҳамда 100 минг нафаргача фарғоналикларни Саудия Арабистонида доимий иш билан таъминлаш масаласи муҳокама қилинди.

Билдирилган таклифлар асосида ҳамкорликда ишни йўлга қўйиш, маълумотлар алмашиниш ва яқин муддатларда Фарғонада қайта учрашувлар ташкил қилинишига келишилди.

Фарғона вилояти делегацияси Қувайт ва Саудия Арабистони сафарини якунлаб, Фарғонага қайтиб келди. “Замин” янгиликларини “Telegram”да кузатиб боринг