“Имкониятлар олами” маркази: Шавкат Мирзиёев Андижонда ижтимоий хизматлар маркази билан танишди

Президент Шавкат Мирзиёев Андижон шаҳрида ташкил этилган “Имкониятлар олами” ҳудудий ижтимоий хизматлар марказига ташриф буюриб, у ерда яратилган замонавий шароитлар билан танишди.

Ушбу марказ 2024 йил 27 февралда қабул қилинган “Ногиронлиги бўлган болаларга ижтимоий хизмат ва ёрдам кўрсатиш тизимини такомиллаштириш” қарори ижроси доирасида илк бор ташкил этилди. 5 гектар майдонда жойлашган мажмуада маъмурий бинолар, инклюзив таълим ва касбга ўргатиш курслари, болалар майдончаси, спорт мажмуаси ва сузиш ҳавзаси мавжуд.

Марказда ногиронлиги бўлган болалар, ёрдамга муҳтож кексалар ва кам таъминланган оилалар фарзандлари учун ижтимоий, тиббий, таълим ва касбга йўналтириш хизматлари кўрсатилади. Хусусан, инглиз, рус, корейс тиллари ва IT йўналишларида таълим бериш йўлга қўйилган.

Президент илк бор ташкил этилган “эрта аралашув” хизмати фаолиятини ҳам кўздан кечирди. Бу бўлим чақалоқликдан уч ёшгача бўлган болалар ва уларнинг оналари учун мўлжалланган. Ногиронлик хавфи аниқланган болалар билан эрта ишлаш орқали уларга тўғри қарамлик ва таълим асослари қўйилади.

Шунингдек, кундузги парвариш хизмати ҳам ташкил этилган. Бу болалар ва катталарнинг жисмоний ва ақлий ҳолатини мустаҳкамлашга, уларнинг яқинларига ишлаш имконини беришга қаратилган. Марказда 60 нафардан зиёд мутахассис иш олиб бормоқда.

Марказдаги спорт мажмуаси замонавий жиҳозлар билан таъминланган. АҚШ ва бошқа давлатлардан келтирилган ускуналар асосида адаптив спорт турлари йўлга қўйилган. Сув ҳавзаси эса болалар ёши ва эҳтиёжларига мослаштирилган ҳолда жиҳозланган.

– Бу етук ғамхўрликнинг ифодасидир. Сизлардан сабр, ишонч ва ҳаракат талаб этилади. Биз бундай имкониятларни янада кўпайтиришни давом эттирамиз, – деди Президентимиз ташриф чоғида. «Замин»ни Telegram’да ўқинг!