Самарқандда Марказий Осиё хавфсизлик кенгашлари терроризмга қарши курашни муҳокама қилди

Самарқанд шаҳрида Ўзбекистон, Қозоғистон, Қирғизистон ва Тожикистон хавфсизлик кенгашлари котиблари, шунингдек, Туркманистоннинг Ўзбекистондаги элчихонаси ҳарбий атташеси иштирокида муҳим йиғилиш бўлиб ўтди. Йиғилишда Марказий Осиё минтақасида терроризм ва экстремизмга қарши кураш чоралари муҳокама қилинди.

Тадбир Ўзбекистоннинг раислиги доирасида Марказий Осиё давлатлари раҳбарларининг маслаҳат учрашувлари форматида ташкил этилди.

Ўзбекистон президенти Шавкат Мирзиёев йиғилиш иштирокчиларига йўллаган табригида Марказий Осиё мамлакатлари яхши қўшничилик, ўзаро ишонч ва конструктив мулоқот асосида стратегик шериклик минтақасига айланаётганини алоҳида таъкидлади.

Хавфсизлик кенгашлари котиблари минтақавий хавфсизликни мустаҳкамлаш, терроризм, экстремизм ва радикаллашув каби таҳдидларга қарши курашиш, трансмиллий уюшган жиноятчиликка қарши кураш, экологик хавфсизликни таъминлаш бўйича ҳамкорлик қилиш, шунингдек, транспорт хавфсизлигини таъминлаш ва транспорт-транзит салоҳиятини ривожлантириш масалаларини муҳокама қилди.

Ўзбекистон Марказий Осиё давлатлари раҳбарларининг маслаҳат учрашувига раислиги доирасида минтақавий шерикликни мустаҳкамлаш, савдо-иқтисодий ҳамкорликни кенгайтириш, транспорт алоқаларини яхшилаш ва минтақавий муаммоларга барқарор ечим топишни мақсад қилган ташаббусларни илгари сурмоқда. «Замин»ни Telegram’да ўқинг!