Ўзбекистонликлар қаерга саёҳат қилмоқда? 2025 йилнинг дастлабки ойларидаги энг оммабоп йўналишлар

Ўзбекистон фуқаролари учун чет элдаги саёҳатлар тобора оммалашиб бормоқда. Миллий статистика қўмитаси 2025 йилнинг январь–март ойларида ўзбекистонликлар томонидан амалга оширилган туристик чиқишлар бўйича расмий маълумотни эълон қилди. Унга кўра, ушбу уч ойлик даврда 1,5 миллион нафардан ортиқ Ўзбекистон фуқароси хорижга туристик мақсадларда сафар қилган.

Бу кўрсаткич ўтган йилнинг мос даври билан таққослаганда 256,5 минг нафарга ёки 20,3 фоизга ошган. Статистика фуқароларнинг халқаро туризмга бўлган қизиқиши изчил ортиб бораётганини кўрсатмоқда.

Қўмитанинг таъкидлашича, саёҳатлар географияси кенгаймоқда, аммо ўрта осиё давлатлари ҳамон энг оммабоп йўналишлардан ҳисобланади.

Январь–март ойларида Ўзбекистон фуқароларининг энг кўп сафар қилган давлатлари рўйхати қуйидагича шаклланган:
- Қирғизистон – 631 240 нафар;
- Тожикистон – 281 539 нафар;
- Қозоғистон – 240 644 нафар;
- Саудия Арабистони – 112 274 нафар;
- Россия – 69 065 нафар;
- Туркия – 46 566 нафар;
- БАА (Бирлашган Араб Амирликлари) – 44 796 нафар;
- Миср – 16 689 нафар;
- Таиланд – 13 456 нафар;
- Вьетнам – 9 574 нафар;
- Бошқа давлатлар – 53 704 нафар.

Кўриниб турибдики, ҳудудий яқинлик, тил ва маданиятдаги ўхшашликлар Қирғизистон, Тожикистон ва Қозоғистонга саёҳатларнинг юқори даражада бўлишига асосий омил бўлмоқда.

Шу билан бирга, Саудия Арабистонига сафарлар сони ҳам юқори — бу эса асосан умра зиёрати билан боғлиқ бўлса, БАА, Туркия, Таиланд ва Вьетнамга саёҳатлар асосан дам олиш ва тижорат мақсадларида амалга оширилаётганини кўрсатади.

Айтиш керакки, глобал иқтисодий ва туризм тенденцияларини инобатга олган ҳолда, яқин йилларда Европа ва Осиё давлатларига бўлган қизиқиш ҳам ошиши кутилмоқда.

Мамлакат фуқароларининг фаол туризмга қизиқиши — жамиятда яшаш даражаси ошиб бораётгани ва дунёқараш кенгаяётганининг ёрқин кўрсаткичи саналади. Туризмни ривожлантириш, саёҳатни енгиллаштирувчи хизматлар ва авиақатновлар сони кўпайиши билан бундай кўрсаткичлар янада ўсиши табиий. «Замин»ни Telegram’да ўқинг!