Сўнгги қўнғироқ тақиқланмади – расмий баёнот

Мактабгача ва мактаб таълими вазирлиги ижтимоий тармоқларда тарқалаётган “Сўнгги қўнғироқ” тадбирлари тақиқлангани ҳақидаги хабарларга муносабат билдирди. Расмий маълумотга кўра, бу хабарлар ҳақиқатга тўғри келмайди ва нотўғри талқин қилинмоқда.

Санага аниқлик киритилди

Вазирлик таъкидлашича, 2023/2024 ўқув йили 25 май, якшанба куни якунланиши кутилмоқда. Ушбу сана дам олиш кунига тўғри келгани сабабли “Сўнгги қўнғироқ” тадбирлари 24 май, шанба куни ўтказилиши белгиланган.

“Сўнгги қўнғироқ мактабларимизда ҳар йилги анъанага мувофиқ кўтаринки руҳда, тантанали тарзда ўтказилади”, — дейилади вазирлик ахборотида.

Ҳар қандай чекловлар рад этилди

Айрим Telegram каналларида тадбирларга чеклов қўйилгани, ҳатто валс тушиш тақиқлангани ҳақидаги хабарлар ҳам тарқалган эди. Бу масалага ҳам изоҳ берилди.

Вазирлик матбуот хизмати “Дарё” нашрига берган маълумотда қайд этилишича, валс рақсини тақиқлаш борасида ҳеч қандай расмий ҳужжат қабул қилинмаган. Аммо айрим ота-оналар фарзандларининг дарсдан кейин рақсга тайёргарлик кўриши, тадбир учун қиммат либослар тиктирилиши ва бу мақсадда пул йиғиш каби ҳолатлардан норози бўлаётгани таъкидланган.

Вазирликдан хавфсизлик тавсиялари

Шу билан бирга, вазирлик мактаб жамоалари, ўқувчилар ва ота-оналарни “Сўнгги қўнғироқ” тадбирлари пайтида хавфсизлик қоидаларига риоя қилишга чақиради.

Zamin.uz таҳририятидан:
Ўқув йилининг якунланиши муносабати билан мактабларда ўтказиладиган “Сўнгги қўнғироқ” тадбирлари – битирувчилар учун унутилмас хотиралардан бири ҳисобланади. Уларни маънавий мазмун ва хавфсиз муҳитда ўтказиш эса барчамизнинг масъулиятимиздир. «Замин»ни Telegram’да ўқинг!