Тошкентда фирибгар ва адвокат пора билан қўлга тушди!

Ўзбекистон Давлат хавфсизлик хизмати Call-марказига келиб тушган шикоят ортидан навбатдаги шов-шувли жиноят фош этилди. Бу сафарги ҳолатда ҳам фирибгарлик билан боғлиқ ҳолат пойтахтимизда аниқланди ва тезкор тадбир натижасида икки шахс пора билан қўлга тушди.

Маълум бўлишича, аввал ҳам фирибгарлик учун жазога тортилган 45 ёшли тошкентлик фуқаро бу сафар адвокат билан тил бириктириб, катта миқдорда пул қўлга киритишни режалаштирган. Ўзига шерик қилиб олган адвокатни эса Ички ишлар вазирлиги Жазони ижро этиш департаментида юқори лавозимда ишлайдиган шахс сифатида таништириб, жиноий режасини амалга оширишга уринган.

Улар шу йўл билан Бухоро вилоятидаги 1-сонли жазони ижро этиш муассасасида суд ҳукми билан 8 йил 7 ойга озодликдан маҳрум этилган маҳкумни Тошкент вилоятидаги 7-сонли муассасага кўчиришни ваъда қилган. Бу “хизмат” учун эса маҳкумнинг яқинларидан 5 минг АҚШ доллари талаб қилинган.

Маҳкумнинг қариндошлари вазиятдан шубҳаланиб, бу бўйича ҳуқуқни муҳофаза қилувчи органларга мурожаат қилган. Тезкор тадбир давомида эса фирибгар ва унинг адвокатлик соҳасидаги шериги пул маблағларини қўлга киритаётган пайтида далиллар билан ушланди.

Ҳозирда ушбу икки шахсга нисбатан Ўзбекистон Республикаси Жиноят кодексининг 168-моддаси (фирибгарлик) ҳамда 28, 211-моддалари (пора беришга уриниш) билан жиноят иши қўзғатилган. Айни вақтда уларга нисбатан қамоқ эҳтиёт чораси қўлланилган бўлиб, тергов жараёнлари олиб борилмоқда.

Давлат хавфсизлик хизмати ва Бош прокуратура ҳузуридаги Иқтисодий жиноятларга қарши курашиш департаменти барча фуқароларни ушбу каби фирибгарлик ҳаракатлари қурбонига айланмаслик учун огоҳ бўлишга ва ҳар қандай шубҳали вазиятда ҳуқуқни муҳофаза қилувчи органларга зудлик билан хабар беришга чақиради.

Шунингдек, давлат органлари бундай қонунбузарликларга қарши қатъий курашишда давом этишини маълум қилган. Бу каби фирибгарликлар ортида турган шахсларга нисбатан жазо муқаррар бўлади.