Тошкент шаҳрида ноқонуний йўл билан йирик маблағ қўлга киритишни кўзлаган икки шахс қўлга олинди. Маълум бўлишича, қурилиш объектларини лойиҳалаш билан шуғулланувчи МЧЖнинг офис менежери ҳамда маклерлик фаолияти билан шуғулланувчи 1990 йилда туғилган фуқаро олдиндан келишиб, тадбиркорнинг ишончига киришга ҳаракат қилишган.
Тергов маълумотларига кўра, уларга тегишли бўлмаган М.Улуғбек туманидаги 50 сотих ер майдонини тадбиркорга 4 миллион АҚШ долларига сотишни ваъда қилишган. Шунингдек, аванс сифатида 100 минг долларни қўлга киритишган. Улар юқори лавозимларда ишлайдиган танишлари орқали ушбу ер майдони мақомини ўзгартириб бериш, турар-жой қурилиши учун рухсатнома олиш, архитектура ва лойиҳа ҳужжатларини расмийлаштириш каби ишлар билан шуғулланишини айтган. Шу хизматлар учун эса қўшимча 200 минг доллар талаб қилишган ва олдиндан яна 100 минг доллар сўрашган.
Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида икки айёр шахс 200 минг долларни қабул қилиб олган вақтда ашёвий далиллар билан ушланди.
Ҳозирда уларга нисбатан Жиноят кодексининг 168-моддаси 4-қисми «а» банди ҳамда 28, 211-моддаси 3-қисми «а» банди билан жиноят иши қўзғатилди ва қамоқ эҳтиёт чораси қўлланилди.
Тергов жараёнида уларнинг бошқа жиноий шерикларини аниқлаш бўйича қўшимча чоралар кўрилмоқда.
«Замин»ни Telegram’да ўқинг!
