Франциянинг Ўзбекистондаги янги элчиси Валид Фук 27 август куни расман ўз вазифасини бажаришга киришди. Бу ҳақда элчихона матбуот хизмати орқали маълум қилинди.
Элчи ўзбек тилида сўзлаб, минг йиллик тарихий мероси, маданияти ва меҳмондўстлиги билан машҳур мамлакатимизда иш бошлаганидан мамнунлигини билдирди.
— Сизлар билан ҳамкорлик қилиш ва икки давлат ўртасидаги тарихий яқинликни янада мустаҳкамлаш учун барча куч-ғайратимни сафарбар қиламан. Келгуси ойларда барча ҳудудларга ташриф буюриб, Франция ва Ўзбекистонни боғлаб турувчи дўстлик ришталарини янада кучайтириш ниятим бор, — деди Валид Фук.
У ўз мурожаатида икки давлат ўртасидаги ҳамкорлик йўналишларига ҳам эътибор қаратди. Жумладан, Франция билан турли лойиҳаларни амалга ошириш, саёҳат ва таълим соҳасида имкониятлардан фойдаланиш, шунингдек, Ўзбекистондаги француз муассасалари, хусусан, Тошкент ва Самарқанддаги Француз альянслари орқали маданий алоқаларни янада ривожлантиришга чақирди.
Маълумот учун, Валид Фук Париж Сиёсий тадқиқотлар институтида таҳсил олган. У 2010–2014 йилларда Франция Ташқи ишлар вазирлигида стратегик масалалар, хавфсизлик ва қуролсизланиш бўйича бошқармада ишлаган. Кейинроқ Пекиндаги элчихонада сиёсий маслаҳатчи, БМТдаги Франция доимий ваколатхонасида сиёсий маслаҳатчи сифатида фаолият юритган.
2020–2025 йиллар мобайнида эса Франция президентининг Осиё, Океания ва Америка масалалари бўйича маслаҳатчиси бўлиб ишлаган.
Эслатиб ўтамиз, Валид Фук янги лавозимда 2021 йилдан буён элчи бўлиб фаолият юритган Орелия Бушез ўрнини эгаллади.
«Замин»ни Telegram’да ўқинг!
