Фарғона вилояти Олтиариқ туманида рўй берган икки инсон ўлими билан боғлиқ жиноят иши бўйича суд ҳукми эълон қилинди. Олий суд ахборот хизмати раҳбари Азиз Абидовнинг маълумот беришича, ўз хотини ва қайнонасини шафқатсизларча пичоқлаб ўлдирган эркак 15 йилу 6 ойга озодликдан маҳрум этилди.
Оилавий низо қотилликка айланди
Маълумотларга кўра, жабрланувчи аёл аввалги никоҳидан ажрашгач, 2024 йил июль ойида иккинчи бор шаръий никоҳ асосида турмуш қурган. Бир неча ой бирга яшаганидан сўнг, ноябрь ойига келиб турли жанжаллар сабаб, у ҳомиладор ҳолда фарзанди билан ота уйига қайтган.
Фожеа содир бўлган куни эса у онаси ва вояга етмаган фарзанди ҳамроҳлигида ижара уйига шахсий буюмларини олиш учун борган. Аммо кутилмаган ҳолат юз берди — эркак ножўя хатти-ҳаракатга қўл уриб, хотини ва қайнонасига пичоқ билан оғир тан жароҳати етказди. Улар воқеа жойида ҳалок бўлган.
Жиноятчининг яна бир шафқатсизлиги
Суриштирув жараёнида маълум бўлишича, қотиллик содир этган шахс воқеадан сўнг хотинининг хорижга чиқиш биометрик паспортини, унинг аввалги никоҳидан бўлган қизининг туғилганлик ҳақидаги гувоҳномасини ва бир қанча бошқа муҳим ҳужжатларни бўлакларга бўлиб ташлаган.
Бу ҳолат жиноятчининг фақат жисмоний эмас, балки маънавий зарар етказиш ниятида ҳам ҳаракат қилганини кўрсатди.
Суд ҳукми
Суд жараёнида айбланувчига нисбатан Жиноят кодексининг бир қатор моддалари қўлланди ва у 15 йилу 6 ой муддатга озодликдан маҳрум этилди.
Мутахассислар таъкидлашича, бу каби фожеалар оилавий муносабатлардаги низоларни вақтида ҳал қилиш ва ҳимоя чораларини кучайтириш зарурлигини яна бир бор кўрсатмоқда.
«Замин»ни Telegram’да ўқинг!
