Тошкент вилоятида боғчаларда содир бўлган оммавий заҳарланиш воқеаси бўйича олиб борилаётган жиноят иши тергови доирасида етти нафар шахсга нисбатан қамоқ эҳтиёт чораси қўлланди. Бу ҳақда Kun.uz манбаси маълумот тарқатди.
Маълум қилинишича, ушланганларнинг уч нафари – заҳарланишга сабаб бўлгани тахмин қилинаётган озиқ-овқат ишлаб чиқарувчи корхона раҳбарлари ва масъул шахслари ҳисобланади. Яна тўрт киши эса боғчаларга маҳсулот етказиб берувчи аутсорсинг компаниялари ходимлари экани айтилмоқда.
Жиноят иши дастлаб вилоят Ички ишлар бош бошқармаси томонидан юритилган бўлса, кейинчалик тергов Ички ишлар вазирлигига топширилгани маълум қилинди.
Аввалроқ Санэпидемия назорати хизматининг маълумот беришича, заҳарланишдан жабрланган болаларга «ўткир гастроэнтерит» ташхиси қўйилган. Умумий ҳисобда 963 нафар тарбияланувчи касалликка чалинган. Улардан 269 нафари шифохонадан соғайиб чиқиб кетган бўлса, яна 421 болага соғломлиги тиклангани учун 27 сентябр куни уйига жавоб берилиши кутилмоқда.
Шу билан бирга, 13 нафар боланинг аҳволи ҳануз ўртача оғир экани таъкидланди. Мутахассислар уларни шифокорлар қатъий назорати остида даволаш ишларини давом эттираётганини маълум қилмоқда.
Аниқланишича, мазкур иш бўйича айбланувчиларга нисбатан Жиноят кодексининг тегишли моддалари асосида тергов ҳаракатлари олиб борилмоқда ва айрим далиллар жиноятга алоқадор шахсларнинг айбини тасдиқлаши мумкинлиги айтилмоқда.
Ҳозирда ушбу жиноят иши жамиятда катта қизиқиш уйғотмоқда. Чунки масала нафақат соғлиқни сақлаш тизими, балки боғчалардаги таъминот ва назорат тизими самарадорлиги ҳақида жиддий саволларни кун тартибига олиб чиқди.
Шу боисдан, мутахассислар бу ишда нафақат айбдорларни аниқлаш, балки бундан кейин бундай ҳолатларни олдини олиш бўйича комплекс чора-тадбирлар кўрилиши зарурлигини таъкидлашмоқда.
«Замин»ни Telegram’да ўқинг!
