Метродаги навбатчи аёл ёрдамида бола соғ-саломат туғилди
6 октябрь куни Тошкент метрополитенининг Ғафур Ғулом бекатида кутилмаган воқеа содир бўлди — йўловчи аёл тўсатдан туғруқ ҳолатига тушиб, чақалоқни дунёга келтирди. Бу ҳақда “Тошкент метрополитени” ДУК матбуот хизмати маълум қилди.
Маълумотларга кўра, поездларни кутиб олиш ва жўнатиш бўйича навбатчи ходима Наима Махамаджонова хизмат давомида ички ишлар ходими томонидан йўловчи аёлнинг ҳолати ҳақида хабардор қилинган. У ҳеч иккиланмасдан, махсус тайёргарлигига таяниб, туғруқ жараёнида зарур ёрдамни кўрсатишга киришган.
Наима Махамаджонова ўзининг хизмат вазифасидан ташқари, тиббий кўникмаларини ишга солиб, аёлнинг фарзандини соғ-саломат дунёга келтиришида бевосита ёрдам берди. У чақалоқнинг нафас олишини фаоллаштириб, киндик қисмини боғлаб, она ва бола соғлиги учун зарур чораларни кўрган.
Бу вақт ичида тез ёрдам хизмати ва аёлнинг яқинлари чақирилган. Тиббиёт ходимлари келгунига қадар тахминан 10 дақиқа давомида метрополитен ходимлари она ва чақалоқни назорат остида ушлаб, уларнинг хавфсизлигини таъминлашган.
Шифокорлар етиб келгач, она ва чақалоқ шифохонага етказилди. Ҳозирда иккаласининг ҳам соғлиги яхши экани маълум қилинди.
Кўпчилик фуқаролар мазкур воқеани ҳақиқий қаҳрамонлик деб баҳоламоқда. Чунки Наима Махамаджонова вазиятни тез англаб, тайёргарлик ва жасорат билан амалга оширган ҳаракатлари туфайли она ва чақалоқнинг ҳаётини сақлаб қолишга муваффақ бўлди.
Метрополитен маъмурияти ходимнинг фидойилиги ва касбий масъулияти учун миннатдорлик билдирди. Бу воқеа нафақат хизматдошлар, балки кўплаб йўловчилар хотирасида ҳам умрбод сақланиб қолиши шубҳасиз.
“Zamin”ни Telegram'да ўқинг!
