Самарқанд вилоятида қўй ўғирлашда гумон қилинган 64 ёшли аёл тергов жараёни давомида вафот этди. Бу ҳақда “Эзгулук” инсон ҳуқуқлари жамияти раиси Абдураҳмон Тошанов ўзининг ижтимоий тармоқдаги саҳифасида маълум қилди.
Маълумотларга кўра, у жорий йилнинг 25 июль куни эҳтиёт чораси сифатида қамоққа олинган ва Самарқанддаги 7-сонли тергов изоляторига жойлаштирилган. Гумонланувчи қандли диабет касаллиги билан оғриган бўлишига қарамай, унинг соғлиғига эътибор берилмаган. Ҳимоячилар томонидан тиббий экспертиза тайинлаш ҳақида бир неча бор илтимос қилинган бўлса-да, бу талаб рад этилган.
Аёлнинг аҳволи кескин ёмонлашгач, у Тошкентдаги махсус тиббий муассаса — “Сангород” шифохонасига олиб борилган. Бироқ у ерда қисқа муддат даволангандан сўнг яна изоляторга қайтарилган. Орaдан кўп ўтмай, у вафот этгани ҳақида хабар берилди.
Ҳозирча расмий идоралар — Ички ишлар, Прокуратура ёки Тўғриқ хизмати томонидан ҳодиса юзасидан изоҳ берилмаган. Аммо жамоатчилик ва инсон ҳуқуқлари фаоллари бу ҳолатни жиддий назоратга олишни сўрамоқда.
“Эзгулук” ташкилоти вакилларининг таъкидлашича, оғир касалликка чалинган шахсни қамоққа жойлаштириш ва унга зарур тиббий ёрдам кўрсатмаслик инсонпарварлик тамойилларига зиддир. Улар бу ҳолатни инсон ҳуқуқларини қўпол равишда бузиш деб баҳолашмоқда.
Ҳозирда ҳолат юзасидан текширув ишлари бошлангани маълум қилинган. Фаоллар тергов муассасаларида тиббий хизмат сифатини ошириш, касал гумонланувчиларга нисбатан муносабатни қайта кўриб чиқиш зарурлигини таъкидламоқда.
Жамоатчилик эса бу воқеа юзасидан холис суриштирув ўтказилиши ва айбдорлар жавобгарликка тортилишига умид билдирмоқда.
“Zamin”ни Telegram'да ўқинг!
