Қорақалпоғистонда содир бўлган фожеали можаро ортидан суд ҳукми чиқарилди. Дўстига оғир тан жароҳати етказиб, унинг ўлимига сабаб бўлган йигит 11 йилга озодликдан маҳрум этилди. Бу ҳақда “Миллий” телеканали орқали хабар қилинди.
Маълумотларга кўра, воқеа 2024 йилнинг 17 декабрь куни Нукус шаҳрида содир бўлган. Икки дўст ўзаро тортишув чоғида жанжаллашиб қолган. Ўзини тўхтата олмаган йигит танишининг бошига ғишт билан уриб оғир жароҳат етказган.
Жабрланувчи ҳушидан кетганидан кейин айбдор унинг кийимлари ва телефонини олиб, ҳодиса жойидан қочиб кетган. Бир неча соат ўтиб, жабрланувчи олинган тан жароҳати оқибатида вафот этган.
Суд жараёнида айбловчи томон далилларни тақдим этгач, айбдор шахс қилмишини тан олган. Суд ҳукмига кўра, у 11 йилга озодликдан маҳрум қилиш жазосига ҳукм қилинди.
Бу воқеа жамиятда катта муҳокамага сабаб бўлди. Кўпчилик ёшлар ўртасидаги тортишув ва урушлар фожеа билан тугаётганини таъкидлаб, эҳтиёткорлик ва сабр-тоқатни биринчи ўринга қўйиш кераклигини қайд этмоқда.
Сўнгги пайтларда мамлакатнинг турли ҳудудларида ёшлар ўртасидаги баҳс ва тортишувлар кескин оқибатларга олиб келаётгани ҳақида кўплаб мисоллар қайд этилмоқда. Мутахассислар бу каби ҳолатларнинг олдини олиш учун маънавий тарбия ва психологик ёрдамни кучайтириш зарурлигини таъкидламоқда.
“Zamin”ни Telegram'да ўқинг!
