Миллий статистика қўмитаси маълумотларига кўра, жорий йилда чет элга чиқиш фаолияти кескин ўсган. Ҳисоботга кўра, 2025 йилнинг дастлабки саккиз ойи мобайнида хорижга сафар қилган ўзбекистонликлар сони 5,1 миллион нафарга етган. Бу кўрсаткич ўтган йилнинг шу даврига нисбатан қарийб 1,1 миллионга ёки 26,8 фоизга кўпдир.
Мутахассислар таъкидлашича, сўнгги йилларда мамлакатда туризм маданияти кенгайиб, хорижий йўналишларга қизиқиш тобора ортаётгани кузатилмоқда. Саёҳат мақсадлари ҳам турлича — зиёрат, меҳнат, дам олиш ёки таълим.
Қуйида 2025 йилнинг биринчи саккиз ойида ўзбекистонликлар энг кўп ташриф буюрган мамлакатлар рўйхати келтирилган:
Қирғизистон — 2,3 миллион нафар саёҳатчи;
Қозоғистон — 956 минг нафар;
Тожикистон — 887,9 минг нафар;
Россия — 312,7 минг нафар;
Туркия — 181,7 минг нафар;
Саудия Арабистони — 165,7 минг нафар;
БАА (Дубай ва бошқалар) — 94,2 минг нафар;
Миср — 45,4 минг нафар;
Ветнам — 28,5 минг нафар;
Хитой — 27,6 минг нафар.
Шунингдек, бошқа давлатларга ҳам 162,4 минг нафар фуқаро борган.
Аналитиклар таъкидлашича, Қирғизистон, Қозоғистон ва Тожикистонга сафарлар асосан меҳнат ва савдо билан боғлиқ бўлса, Туркия, Миср ва БАА каби йўналишлар дам олиш ва туризм мақсадида танланмоқда. Саудия Арабистони эса анъанавий зиёрат манзили сифатида юқори ўринни сақлаб қолган.
Туризм соҳасидаги бу ўсиш нафақат иқтисодий фаолликнинг белгиси, балки фуқароларнинг ташқи дунёга бўлган қизиқиши, маданий алмашинув ва саёҳат маданияти ривожланаётганидан дарак беради.
Шундай қилиб, ўзбекистонликлар чет элдаги таассуротлар орқали нафақат дунё манзараларини кашф этмоқда, балки янги билим ва тажрибаларни ҳам юртимизга олиб қайтмоқда.
“Zamin”ни Telegram'да ўқинг!
