Ижтимоий тармоқларда тарқалган видеолар фойдаланувчиларни ҳам ҳайратга, ҳам ларзага солди — Янгиҳаёт туманида бир бола 4-қават балконидан тушиб кетиш хавфи остида қолган. Аммо воқеа ҳақиқий фожеага айланишидан олдин қаҳрамонлик содир бўлди.
Тошкент шаҳар Ички ишлар бош бошқармаси маълумотига кўра, бола 5-қаватда истиқомат қиладиган талаба йигит томонидан қутқариб қолинган. У ҳеч қандай ҳимоя воситаларисиз пастга тушиб, боланинг ҳаётини сақлаб қолишга муваффақ бўлган.
Қутқарувчи талабанинг сўзларига кўра, у 5-қаватдан 4-қават балконига тушганида, бир эмас — уч нафар бола бўлганини кўрган. У вазиятни баҳолаб, тезкорлик билан ҳаракат қилган ва болаларни хавфдан омон сақлаб қолган.
ИИББнинг маълумот беришича, воқеадан кейин маҳалла профилактика инспектори болаларнинг онаси билан профилактик суҳбат ўтказган. Унга болалар хавфсизлигини таъминлаш ва уларни назоратсиз қолдирмаслик бўйича тушунтиришлар берилган.
Ҳозирги кунда ижтимоий тармоқ фойдаланувчилари қаҳрамон талабани миннатдорлик билан ёд этмоқда. Кўпчилик уни ҳақиқий жасорат ва инсонпарварлик намунаси деб атади.
Бундай фидокорлик ҳаракати нафақат бир боланинг ҳаётини сақлаб қолди, балки жамиятга ҳам аҳамиятли сабоқ бўлди — эҳтиёткорлик ва инсонпарварлик ҳар қандай ҳолатда ҳам энг катта куч эканини яна бир бор исботлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
