Сурхондарё вилоятида қурилиш соҳасида навбатдаги фирибгарлик ҳолати фош этилди. Бу сафар “лойиҳа ҳужжатларини осон ўтказиб бериш” баҳонаси билан пора талаб қилингани маълум бўлди.
Маълумотларга кўра, қурилиш ишларини лойиҳалаштириш билан шуғулланувчи хусусий корхона архитектори Музработ туманида яшовчи фуқаронинг ишончига кирган. У фуқарога тегишли бўлган, қурилиши ҳали якунланмаган бино ҳужжатларини тегишли идоралардан “муаммосиз” тасдиқлатиб беришни ваъда қилган. Эвазига эса 17 миллион сўм талаб қилган.
Давлат хавфсизлик хизмати ва ички ишлар органлари ҳамкорлигида ўтказилган тезкор тадбирда мазкур шахс сўралган пулни олаётган вақтда ашёвий далиллар билан ушланган.
Бироқ ҳодиса шу билан тугамади. Тергов жараёнида аниқланишича, архитектор 17 миллион сўмдан 1 миллионни Музработ туман қурилиш ва уй-жой коммунал хўжалиги бўлими бошлиғига беришни режалаштирган. Натижада мазкур мансабдор ҳам пора маблағини қабул қилаётган вақтида қўлга олинди.
Ҳозирда ҳар икки шахсга нисбатан жиноят иши қўзғатилган ва тергов ҳаракатлари давом этмоқда.
Тергов органлари маълум қилишича, қурилиш соҳасидаги бундай ҳолатлар сўнгги вақтларда кўпайиб бораётгани сабабли, жойларда назорат ва шаффофликни таъминлаш чоралари кучайтирилмоқда.
Экспертлар таъкидлашича, лойиҳа ҳужжатларини тезлаштириш баҳонасида пора талаб қилиш ҳолатлари нафақат қонунбузарлик, балки қурилиш сифатининг пасайишига ҳам олиб келиши мумкин.
Сурхондарё воқеаси шундан далолат бермоқда: адолатдан четга чиққан ҳар қандай ҳаракат барибир фош бўлади.
“Zamin”ни Telegram'да ўқинг!
