Наманганда ижтимоий тармоқ орқали аёлни шантаж қилган шахс қўлга олинди. Бу ҳақда вилоят Ички ишлар бошқармаси маълум қилди.
Маълумотларга кўра, Косонсой туманида яшовчи эркак ўз телефони орқали бегона аёлнинг раққосалик қилган видеоларини Instagram’da турли талқинда жойлаштирган. Аёл бу ҳолатдан норози бўлиб, видеоларни ўчиришни сўраганида, эркак ундан 350 минг сўм талаб қилган ва банк картаси рақамини юборган.
Бироқ аёл пулни ўтказганидан сўнг ҳам видеолар тармоқдан ўчирилмаган. Аксинча, эркак аккаунт номини ўзгартириб, шу тасвирларни яна қайта жойлаштирган. Аёл иккинчи марта ҳам пул тўлашга мажбур бўлган.
Натижада жабрланувчининг турмуш ўртоғи ички ишлар бўлимига мурожаат қилган. Тезкор ҳаракатлар натижасида шантаж орқали пул ундиришга уринган шахс аниқланиб, ушланган.
Ҳозирда мазкур ҳолат бўйича жиноят иши қўзғатилган ва тергов ҳаракатлари олиб борилмоқда. Ҳуқуқ-тартибот идоралари фуқароларни бегона шахсларга шахсий маълумотларини ишониб топширмасликка ва ижтимоий тармоқларда эҳтиёткор бўлишга чақирмоқда.
“Zamin”ни Telegram'да ўқинг!
