Тошкентда электр энергиясидан ноқонуний фойдаланиш ҳолати аниқланди. Бу ҳақда “Ўзенергоинспекция” матбуот хизмати хабар берди.
Тошкент вилояти “Ўзенергоинспекция” бошқармаси ходимлари томонидан ўтказилган назорат тадбири давомида Бектемир туманидаги “P. K.R.” МЧЖга тегишли кўп қаватли уй текширилди. Текширув жараёнида мазкур кўп қаватли уйнинг турли жиҳозлари электр таъминотига ўзбошимчалик билан уланиб, йирик миқдорда ноқонуний электр энергияси ишлатилгани аниқланди.
Дастлабки ҳисоб-китобларга кўра, етказилган зарар миқдори 2 миллиард 543 миллион сўмни ташкил этди. Ҳолат юзасидан тўпланган барча материаллар ҳуқуқни муҳофаза қилиш органларига юборилди.
Текширув натижасига кўра масъул шахсларнинг қилмишига ҳуқуқий баҳолаш берилади. Ўзбекистон Республикаси Жиноят кодексининг “Ўғирлик” моддасининг 4-қисми бўйича айбдорлар 15 йилгача озодликдан маҳрум этилиши мумкин.
Меҳмон гуруҳидаги фойдаланувчилар ушбу мақолага изоҳ қолдира олмайди.
