Пойтахтда коррупцияга оид навбатдаги ҳолат фош этилди. Тошкент шаҳри туманларидан бирида фаолият юритувчи электр тармоқлари корхонасига қарашли икки нафар муҳандис хизмат вазифасини суиистеъмол қилган ҳолда пора талаб қилгани аниқланди.
Маълумотларга кўра, муҳандислар тижорат банки филиали биносида ўрнатилган электр ҳисоблагични текшириш жараёнида қонунбузилиш ҳолатини қайд этган. Текширув давомида ҳисоблагич тармоққа нотўғри схема орқали улангани ва шу сабабли электр энергияси сарфи бўйича ҳисоб-китоблар нотўғри юритилгани маълум бўлган. Ушбу асосда 400 миллион сўм миқдорида жарима қўлланилиши белгиланган.
Бироқ мансабдор шахслар бу ҳолатдан шахсий манфаат йўлида фойдаланишга уринган. Улар электр тармоғини улаш ишларини амалга оширган масъул МЧЖ раҳбарига жарима миқдорини 65 миллион сўмгача камайтириб беришни таклиф қилган ва бунинг эвазига 8 минг АҚШ доллари талаб қилган.
Ўтказилган тезкор тадбир натижасида, Давлат хавфсизлик хизматининг ҳудудий бошқармаси ҳамда Иқтисодий жиноятларга қарши курашиш департаменти ходимлари муҳандисларни пора маблағини учинчи шахс орқали қабул қилаётган вақтда қўлга олди.
Ҳозирги вақтда мазкур ҳолат юзасидан жиноят иши қўзғатилган бўлиб, барча ҳолатлар атрофлича ўрганилмоқда. Тергов ҳаракатлари давом этмоқда ва айбдор шахсларга нисбатан қонуний чора кўрилиши кутилмоқда.
Мутасаддилар фуқароларни бундай қонунбузилишларга бефарқ бўлмасликка чақирмоқда. Агар шундай ҳолатларга дуч келинса, 1520 қисқа рақами орқали хабар бериш мумкинлиги таъкидланди. Шу билан бирга, мурожаат этувчиларнинг шахси сир сақланиши кафолатланади.
“Zamin”ни Telegram'да ўқинг!
