Тошкент вилояти Ички ишлар бошқармасида ўтказилган кенгайтирилган йиғилишда жамоат хавфсизлиги тизими танқидий руҳда таҳлил қилинди. Йиғилиш давомида ҳудудларда хавфсизликни таъминлаш бўйича амалга оширилган ишлар, техник воситалар жорий этилиши ва профилактика тадбирлари муҳокама қилинди. Бироқ текширув натижалари айрим ҳисоботлар амалдаги ҳолатга тўлиқ мос келмаслигини кўрсатди.
Маълум қилинишича, сўнгги вақтларда вилоятда хавфсизлик тизимини кучайтириш мақсадида катта ҳажмда ишлар амалга оширилган. Хусусан, 400 дан ортиқ «намунали хавфсиз кўча» ҳамда 280 та «хавфсиз уй» ташкил этилгани қайд этилди.
Шунингдек, ҳудудларда 1000 та кузатув камераси ва 700 та домофон ўрнатилгани, яна 4800 та объект техник қўриқлаш тизимига улангани ҳақида маълумот берилган.
Бироқ текширувлар жараёнида айрим ҳолатларда расмий ҳисоботлардаги маълумотлар ҳақиқатга тўлиқ мос келмаслиги аниқланган. Энг асосий муаммолардан бири — қўшиб ёзиш ҳолатлари бўлган.
Текширувчиларнинг таъкидлашича, айрим видеокузатув камералари ва домофонлар ҳужжатларда «ўрнатилган» деб кўрсатилган бўлса-да, амалда улар мавжуд эмаслиги ёки ишламаслиги маълум бўлган. Айрим ҳолатларда эса эски техник воситалар янги қурилма сифатида расмийлаштирилган.
Бундан ташқари, жиноятчилик даражаси юқори бўлган 100 дан ортиқ «қизил» тоифадаги маҳаллаларда вазият оғирлигича қолаётгани ҳам қайд этилди. Ҳисоботларда ижобий ўзгаришлар кўрсатилганига қарамай, айрим ҳудудларда ҳуқуқбузарлик ва жиноятчилик билан боғлиқ муаммолар сақланиб қолмоқда.
Мутахассислар фикрича, бундай ҳолатлар хавфсизлик тизимидаги реал аҳволни тўғри баҳолашга тўсқинлик қилиши мумкин. Чунки қоғозда яхши кўринган кўрсаткичлар амалдаги муаммоларни яшириб қўяди.
Йиғилиш якунида масъулларга аниқланган камчиликларни қисқа муддатларда бартараф этиш, техник қўриқлаш тизимларини ҳақиқий ҳолатга келтириш ва ҳисоботларда шаффофликни таъминлаш бўйича қатъий топшириқлар берилди.
Ҳуқуқни муҳофаза қилувчи органлар ва мутасаддиларга жойлардаги хавфсизлик тизимини фақат ҳисобот учун эмас, балки аҳоли тинчлиги ва хавфсизлигини таъминлаш мақсадида самарали ишлатиш зарурлиги алоҳида таъкидланди.
“Zamin”ни Telegram'да ўқинг!
