Тошкент шаҳрида бир неча йилдан бери наркотик моддалар сотиш билан шуғулланиб келган аёл ва унинг икки ўғли қўлга олинди. Давлат хавфсизлик хизмати маълум қилишича, махсус тезкор тадбир шарофати билан оилавий тарзда ташкил қилинган ноқонуний савдо занжири фош этилган.
Маълумотларга кўра, ДХХнинг Тошкент шаҳар бўйича бошқармаси ИИББ ва Божхона ходимлари билан ҳамкорликда ўтказган муросасиз амалий чора-тадбир пайтида бутун операциянинг изи топилган. Тожикистондан контрабанда қилиб олиб келинаётган гиёҳванд моддаларни пойтахтга етказиш ва тарқатиш билан шуғулланган оила аъзолари олдиндан кузатувга олинган.
Тезкор тадбир жараёнида Тошкент вилоятининг “Оҳангарон – Пискент” йўналишида ҳаракатланаётган Equinox машинаси тўхтатилган. Автомобилда бўлган 49 ёшли аёл ва 26 ёшли ўғли тожикистонлик шериклари яшириб кетган гиёҳванд моддаларни олиш учун йўлга чиққанлиги аниқланган. Уларнинг уяли телефонлари текширилганда Telegram орқали наркотик модданинг аниқ геолокацияси, муайян расмлари ва топшириқлар юборилгани маълум бўлган.
Шундан сўнг тезкорлар Пискент туманидаги йўл четида пул тўпламидек яширилган 4 кг 985 грамм гашиш моддасини ашёвий далил сифатида расмийлаштирган. Бу ҳали ҳаммаси эмас — уларнинг Олмазор туманидаги хонадонидан қўшимча равишда 1 кг 124 грамм опий ва 1 кг 976 грамм гашиш ҳам топилган. Текширув чоғида аёлнинг 1996 йилда туғилган, аввал судланган иккинчи ўғли ҳам процессуал тартибда ушлангани маълум қилинди.
Ушбу оилага нисбатан Жиноят кодексининг бир нечта оғир моддалари — 28,246-модда 2-қисм ва 25,273-модда 5-қисми бўйича иш қўзғатилиб, улар қамоққа олинган. Ҳозирда тергов ҳаракатлари давом этмоқда ва иш тўлиқ очиққа чиқарилиши кутилмоқда.
Тезкор қўлга олиш жараёни яна бир бор ҳуқуқ-тартибот органлари гиёҳвандликка қарши қатъий кураш олиб бораётганини кўрсатиб турибди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
