Жиззах вилоятида кеча тунги вақт содир бўлган йўл-транспорт фожиаси барчани ҳаяжонга солди. 21 ноябрь куни соат 23:50 атрофида Ш. Рашидов тумани ҳудудидан ўтувчи халқаро аҳамиятга эга М-39 «Тошкент–Термиз» йўлининг 989-чақириғида икки автомашина иштирокида аянчли ҳалокат қайд этилди.
Расмий маълумотларга кўра, Қашқадарё вилоятининг Чироқчи туманида яшовчи, 2003 йилда туғилган ҳайдовчи бошқарувидаги «ISUZU» юк автомобили Самарқанд йўналишидаги АГҚШдан чиқар экан, ушбу йўл участкасида ўрнатилган 2.4 — «Йўл беринг» ва 4.1.2 — «Ҳаракатланиш ўнга» белгиларининг талабларига риоя қилмаган. Ҳайдовчи белгиланмаган жойдан кесиб ўтишга уринган ва шу пайт йўлнинг қатнов қисмига чиқиб кетган.
Айнан шу хатолик оқибатида Тошкент–Самарқанд йўналиши бўйлаб ҳаракатланиб келаётган, Сурхондарёнинг Олтинсой туманида истиқомат қилган 2002 йилда туғилган йигит бошқарувидаги «Ласетти» юк машинасига бориб урилган. Тўқнашув шиддати шунчалик кучли бўлганки, енгил автомобилнинг двигатель қисмида ёнғин келиб чиққан ва машина бир зумда ёниб кетган.
Фожиа оқибати ўта аламли: «Ласетти» ҳайдовчиси ва салонда бўлган яна тўрт нафар йўловчи оғир тан жароҳатлари олиб, ҳодиса жойида ҳалок бўлган. Қутқарув хизматлари воқеага тез етиб келган бўлса-да, улар ҳаёт учун күрaша олмаган.
Айни пайтда Жиззах вилояти ИИБ Тергов бошқармаси томонидан жиноят иши қўзғатилган. Тергов ҳаракатлари Ўзбекистон Республикаси Жиноят кодексининг 266-моддаси 3-қисми «а» банди — «ЙТҲ ортидан инсонлар ўлимига сабаб бўлиш» асосида олиб борилмоқда.
Ҳозирча асосий версия юк автомобили ҳайдовчисининг йўл қоидаларини қўпол равишда бузиши бўлиб турибди. Тергов жараёнида барча техник экспертлар хулосаси, кузатув камералари ёзувлари ва гувоҳларнинг кўрсатмалари ўрганилади.
М-39 каби катта аҳамиятга эга магистраллардаги ҳаракат қоидаларига бефарқлик бир неча секунд ичида қайтариб бўлмас оқибатларга олиб келиши мумкинлиги яна бир бор исботини топди.
“Zamin”ни Telegram'да ўқинг!
