Тошкент шаҳри Мирзо Улуғбек туманида онасини бир неча бор уриб-тепиб ўлдирган эркакка нисбатан суд ҳукми эълон қилинди. Тошкент шаҳар суди берилган маълумотга кўра, у умумий тартибли колонияда 15 йил озодликдан маҳрум этилади ва алкоголга қарамлик сабаб мажбурий даволанишдан ўтади.
Тергов маълумотларига қараганда, фожиа оилавий келишмовчилик оқибатида юз берган. Судланувчининг онаси ўғлининг ўз уйини сотиш ва собиқ турмуш ўртоғи ҳамда қизи яшаб турган хорижий давлатга кўчиб ўтиш режасига қаршилик қилган. Маст ҳолдаги эркак жанжал чоғида онасига бир неча маротаба куч ишлатиб, оғир тан жароҳатлари етказган. Аёл воқеа жойида вафот этган.
Терговда суд-тиббий экспертиза хулосалари, психиатрия текшируви, гувоҳларнинг баёноти, жиноят содир бўлган ҳудудни кўздан кечириш натижалари ва ашёвий далиллар тўлиқ ўрганилди.
Суд мажлисида судланувчининг қизи улар орасида олдин жиддий низолар бўлмаганини таъкидлаб, енгилроқ жазо берилишини сўради. Айбланувчининг рафиқаси эса унинг узоқ йиллар давомида алкоголизмдан азият чекканини маълум қилди.
Суд ҳукмига кўра, эркак 15 йиллик жазони умумий тартибли колонияда ўтайди. Шу билан бирга, у алкоголдан мажбурий равишда даволанишга ҳам юборилади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
