Давлат хавфсизлик хизмати ҳамда Ички ишлар вазирлиги ходимлари ҳамкорлигида одам савдосига қарши курашиш доирасида ўтказилган тезкор тадбир давомида Тошкент халқаро аэропортида жиноий ҳаракатга алоқадор шахс қўлга олинди. Ҳуқуқни муҳофаза қилувчи органлар томонидан амалга оширилган мазкур операция натижасида оғир жиноятнинг олди олинди.
Маълум бўлишича, пойтахтда яшовчи, 1998 йилда туғилган С.Н. икки нафар фуқарони Таиландга олиб чиқиб кетиш орқали уларни фоҳишаликка жалб қилишни режалаштирган. У айнан ушбу мақсадда фуқароларни чет элга жўнатиш арафасида аэропорт ҳудудида ушланган.
Дастлабки суриштирув маълумотларига кўра, мазкур жиноий схема ортида ҳозирда Таиланд ҳудудида бўлиб турган, 2005 йилда туғилган Ф.А. тургани аниқланган. Тергов органлари уни жиноятни ташкил этган шахс сифатида кўрсатмоқда.
Қайд этилишича, ҳолат юзасидан гумонланувчиларга нисбатан Ўзбекистон Республикаси Жиноят кодексининг 135-моддаси 2-қисми “б”, “г”, “е”, “з” бандлари асосида жиноят иши қўзғатилган. Айни пайтда барча ҳолатларга ҳуқуқий баҳо бериш мақсадида тергов ҳаракатлари давом этмоқда.
Мутахассислар таъкидлашича, бундай тезкор тадбирлар фуқаролар хавфсизлигини таъминлаш, айниқса, одам савдоси каби оғир жиноятларга қарши самарали курашишда муҳим аҳамият касб этади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
