Хўжаободда бозор растаси қулади, тадбиркор жароҳат олди
2025 йил 21 декабр куни соат 11:00 ларда Андижон вилояти Хўжаобод туманидаги кийим-кечак бозорида қўлбола ўрнатилган савдо растаси қулаб, бир нафар тадбиркор жароҳат олди. Раста техник ва хавфсизлик талабларига жавоб бермаган, унинг юқори қисмига меъёрдан ортиқ оғир қишки кийимлар илиб қўйилгани қулашга сабаб бўлган. Тадбиркорга тиббий ёрдам кўрсатилди, унинг аҳволи қониқарли ва ҳаётига хавф йўқ. Бошқа фуқаролар жабрланмаган, ҳодиса сабаблари ўрганилмоқда.
Андижон вилояти Хўжаобод туманида жойлашган буюм, яъни кийим-кечак савдоси амалга ошириладиган бозор ҳудудида нохуш ҳодиса қайд этилди. Маълумотларга кўра, 2025 йил 21 декабрь куни тахминан соат 11:00 ларда савдо расталаридан бири қулаган.
Расмий манбалар билдиришича, мазкур раста тадбиркор томонидан дўкон олди қисмига қўлбола тарзда ўрнатилган бўлиб, белгиланган техник ва хавфсизлик талабларига жавоб бермаган. Шунингдек, конструкциянинг юқори қисмига меъёрдан ортиқ миқдорда оғир қишки кийимлар илиб қўйилгани ҳолатни янада хавфли қилган. Ортиқча юклама оқибатида растанинг барқарорлиги йўқолиб, у қулаган.
Ҳодиса натижасида қоидабузарликка йўл қўйган бир нафар тадбиркор тан жароҳати олган. У зудлик билан тиббиёт муассасасига етказилиб, зарур биринчи тиббий ёрдам кўрсатилган. Айни пайтда унинг аҳволи қониқарли, ҳаётига хавф йўқлиги маълум қилинди. Бошқа фуқаролар орасида жабрланганлар аниқланмаган.
Ҳозирда тегишли мутасаддилар томонидан воқеанинг барча сабаб ва ҳолатлари ўрганилмоқда. Шу билан бирга, бозор ҳудудидаги савдо объектларининг хавфсизлик талабларига мослиги қайта кўриб чиқилиши мумкинлиги ҳам таъкидланмоқда. Бу каби ҳодисалар келгусида такрорланмаслиги учун тадбиркорлардан белгиланган қоидаларга қатъий амал қилиш сўралмоқда.
Изоҳлар 0
…