Давлат хавфсизлик хизмати ва Ўзбекистон Божхона қўмитаси Россиядан йирик миқдордаги синтетик наркотик моддаларни олиб киришга уринишнинг олдини олди. Бу ҳақда Podrobno.uz хабар беради.
Ҳодиса Тошкент вилоятидаги "Навоий" чегара божхона постида юз берди. Қозоғистон орқали транзит тарзда келган Lada Largus автомобили текширилганида, ҳуқуқни муҳофаза қилиш органлари ходимлари тақиқланган моддалар яширилган махсус жойни аниқлашди.
Автомобилни Бухоро вилоятида яшовчи, 2000-йилда туғилган фуқаро бошқариб келган. Транспорт воситасининг юк бўлимида, "Газель" автомобилининг узатмалар қутиси ичида умумий оғирлиги 2,3 килограмм бўлган бешта ўрам мефедрон яширилган эди.
Тезкор тадбирлар давомида аниқланишича, ҳайдовчи "Ўзбекистон – Россия" йўналишида юк ташиш билан шуғулланган ва ушбу автомобиль эҳтиёт қисмини Тошкент вилоятида яшовчи, 2000-йилда туғилган шахсга топшириши керак бўлган. Буюртмани қабул қилиш вақтида гумонланувчи қўлга олинди.
Мазкур ҳолат юзасидан икки гумонланувчига нисбатан Жиноят кодексининг 246-моддаси (Контрабанда) иккинчи қисми ва 273-моддаси (Наркотик моддаларни ноқонуний тайёрлаш, сотиб олиш ва сақлаш) бешинчи қисми бўйича жиноят иши қўзғатилди. Ҳар икки гумонланувчи ҳибсга олинган.
Меҳмон гуруҳидаги фойдаланувчилар ушбу мақолага изоҳ қолдира олмайди.
