Сирдарё вилояти Мирзаобод тумани мажбурий ижро бюросида ишловчи икки нафар давлат ижрочиси Давлат хавфсизлик хизмати ўтказган тезкор тадбир давомида қўлга олинди. Терговчиларга кўра, мансабдор шахслар 2021 йил декабр ойида Гулистон туманлараро фуқаролик суди томонидан чиқарилган суд ҳужжатини ижро этиш билан боғлиқ ноқонуний схемада иштирок этган.
Тергов маълумотларига кўра, суд қарорига асосан қарздордан 30 миллион сўм ундирилиши керак бўлган. Икки ижрочи ижро ишини тугатиш эвазига қарздордан 20 миллион сўм талаб қилиб, ушбу пулларни олгани айтилмоқда. Шундан сўнг улар даъвогарга қарздор оғир молиявий аҳволда эканини айтиб, атиги 14 миллион сўмни топширган ва тўлиқ 30 миллион сўм тўлангани ҳақида ёзма тилхат олган.
Тезкор тадбир давомида гумонланувчилар туман прокуратураси биноси олдида қолган 6 миллион сўмни ўзаро бўлиб олаётган пайтда ашёвий далиллар билан ушланди. Сирдарё вилояти прокуратураси томонидан жиноят иши қўзғатилди ва икки гумонланувчи қамоққа олинди. Тергов ҳаракатлари давом этмоқда.
Расмийлар шунга ўхшаш ҳолатларга дуч келган фуқароларга Давлат хавфсизлик хизматининг 1520 қисқа ишонч телефони орқали мурожаат қилишни тавсия этди. Мансабдорлар мурожаат қилувчиларнинг шахси сир сақланишини билдирди.
“Zamin”ни Telegram'да ўқинг!
