Ўзбекистонда ижтимоий ҳимояни кучайтиришга қаратилган яна бир муҳим қадам ташланди. Янги қабул қилинган қонунга мувофиқ, ногиронлиги бўлган болаларга кундузги парвариш хизматини кўрсатувчи тадбиркорлар учун кенг кўламли солиқ имтиёзлари жорий этилди.
Қонун (ЎРҚ–1129-сон, 2026 йил 17 апрель) билан қатор меъёрий-ҳуқуқий ҳужжатларга ўзгартириш ва қўшимчалар киритилиб, айниқса аҳолининг ижтимоий ҳимояга муҳтож қатламларини қўллаб-қувватлашга алоҳида эътибор қаратилди.
Солиқ кодексига киритилган янги нормаларга кўра, 3 ёшдан 18 ёшгача ногиронлиги бўлган болалар учун кундузги парвариш хизматидан фойдаланувчи ота-оналарга ҳам енгилликлар берилмоқда. Хусусан, агар фарзанд хусусий мактаб ёки боғчага қатнаса, ҳар бир бола учун ойига 3 миллион сўмгача бўлган тўловлар жисмоний шахслар даромад солиғидан озод этилади.
Бу ўзгаришлар ота-оналар учун молиявий юкни енгиллаштириш, шу билан бирга болаларга сифатли парвариш хизматларидан фойдаланиш имкониятини кенгайтиришга хизмат қилади.
Шунингдек, давлат-хусусий шериклик асосида фаолият юритиб, 3 ёшдан 18 ёшгача ногиронлиги бўлган болаларга кундузги парвариш хизматини кўрсатаётган тадбиркорлар учун ҳам жиддий имтиёзлар белгиланди. Улар барча турдаги солиқларни тўлашдан (ижтимоий солиқ бундан мустасно) 2030 йил 1 январга қадар озод қилинади.
Бу қарор соҳада хусусий сектор фаоллигини ошириш, янги иш ўринлари яратиш ва хизматлар сифатини яхшилашга туртки бериши кутилмоқда.
Бундан ташқари, «Аҳоли бандлиги тўғрисида»ги қонунга киритилган қўшимчаларга кўра, «Инсон» марказлари тавсияси асосида маҳаллий меҳнат органларига тақдим этилган рўйхатлар орқали тазйиқ ва зўравонликдан жабр кўрган, маълум билим ва кўникмаларга эга хотин-қизлар иш қидираётган шахс сифатида расман рўйхатга олиниши мумкин.
Мазкур янгиликлар нафақат ижтимоий адолатни таъминлаш, балки аҳолининг заиф қатламларини қўллаб-қувватлаш ва уларни жамият ҳаётига фаол жалб этишда муҳим аҳамият касб этади.
Қонун расман эълон қилинган кундан бошлаб кучга кирди ва амалиётга жорий этилмоқда.
“Zamin”ни Telegram'да ўқинг!
