Самарқанд вилоятида соғлиқни сақлаш тизимини такомиллаштириш борасида амалга оширилаётган ишлар ўз самарасини кўрсатмоқда. Хусусан, Ургут туманида жойлашган “Навоий” оилавий поликлиникаси қисқа вақт ичида тубдан ўзгариб, мутлақо янги қиёфага кирди.
Маълум қилинишича, 2025 йил 18 декабрь куни ушбу муассаса деярли ташландиқ аҳволда бўлган. Орадан атиги тўрт ой ўтиб эса у замонавий талабларга жавоб берадиган, қулай ва жиҳозланган тиббиёт муассасасига айланди. Янги бинода фаолият юритаётган шифокор ва тиббиёт ходимлари қўшимча ўқув курсларида малака ошириб қайтган бўлиб, эндиликда яхшиланган шароитларда аҳолига хизмат кўрсатмоқда.
Президент Администрацияси раҳбари Саида Мирзиёева Самарқанд вилоятига амалга оширган ташрифи давомида ушбу ҳудудга ташриф буюриб, поликлиникада яратилган шароитлар билан танишди. Шунингдек, у Ургут туманида фермерлар оиласи — Ҳайдаровлар хонадонида ҳам меҳмон бўлди.
Янгиланган тиббиёт муассасасидаги туғруқ бўлими алоҳида эътиборга лойиқ. У 16 та қишлоқ аҳолисига хизмат кўрсатиб, замонавий стандартлар асосида жиҳозланган. Қайд этилишича, яқинда айнан шу ерда биринчи чақалоқ — Шавкатжон дунёга келган. Саида Мирзиёева бу воқеани амалга оширилаётган ислоҳотларнинг хайрли натижаси сифатида баҳолаб, она ва болага соғлик, чақалоққа эса ёруғ келажак тилади.
«Бу ердаги 16 та қишлоқнинг аёлларига хизмат кўрсатаётган туғруқ бўлими энг замонавий талабларга жавоб беради. Куни кеча ушбу даргоҳда биринчи чақалоқ – Шавкатжон дунёга келди. Мен буни бошлаган барча ишларимизнинг хайрли эканига бир ишора, деб билдим.
Она-болага мустаҳкам соғлик тилаймиз. Янги меҳмоннинг толеи баланд бўлсин!» деб ёзди Саида Мирзиёева.
Ҳозирда Ургут туманида тиббий хизмат сифатини янада оширишга қаратилган ишлар изчил давом этмоқда. Жорий йил якунига қадар 23 та тиббиёт объектини реконструкция қилиш ҳамда 770 нафар мутахассисни қайта тайёрлаш режалаштирилган. Бу эса аҳоли учун тиббий хизматларни янада қулай ва сифатли қилишга хизмат қилади.
Маълумот ўрнида айтиш жоиз, мазкур поликлиника 13 мингдан ортиқ аҳолига хизмат кўрсатади. Муассаса замонавий тиббий ускуналар билан таъминланган бўлиб, бу ерда малакали мутахассислар фаолият юритмоқда. Барча шароитлар яратилгани эса бирламчи тиббий-санитария ёрдамини юқори даражада ташкил этиш имконини бермоқда.
Қисқача айтганда, бу каби янгиланишлар нафақат инфратузилмани, балки одамларнинг ҳаёт сифати ва соғлиғини ҳам сезиларли даражада яхшилашга хизмат қилмоқда.
“Zamin”ни Telegram'да ўқинг!
