Фото: ЙҲХХ эълон қилган видеодан олинган кадр
Ўзбекистонда йўл ҳаракати қоидаларини бузганлик учун жорий этилган балл тизими амалда ўз таъсирини кўрсата бошлади. Йўл ҳаракати хавфсизлиги хизмати маълум қилишича, республикада илк бор жарима баллари 12 баллдан ошган ҳайдовчи аниқланди ва у ҳайдовчилик ҳуқуқидан маҳрум этилиш арафасида турибди.
Маълумотларга кўра, мазкур ҳайдовчи жами 12,5 балл тўплаган. Унинг ўзи ҳам бу ҳолатга аввал ишонмаганини тан олган. “12 баллик тизим борлигига жиддий қарамаган эдим. ЙҲХБга чақиришди, бориб ўз кўзим билан кўрдим. Энди ишим судда кўриб чиқилади, гувоҳномамдан айрилишим мумкин”, — деган у.
Қайд этилишича, ушбу ҳолат Сурхондарё вилоятида қайд этилган. Бу эса янги тизим барча ҳудудларда босқичма-босқич ишга тушганини кўрсатади.
Статистикага назар ташласак, ҳозирда республика бўйича яна 11 нафар ҳайдовчининг ҳисобида 8 дан 10 гача жарима баллари мавжуд. Уларнинг 5 нафари Тошкент шаҳрида, 3 нафари Сурхондарё вилоятида қайд этилган. Шунингдек, Наманган, Самарқанд ва Тошкент вилоятларида ҳам бундай қоидабузарлардан биттадан мавжуд.
Эслатиб ўтиш жоиз, жарима баллари тизими босқичма-босқич жорий этилган. 2025 йил 1 июндан бошлаб ЙҲХ ходимлари томонидан қўлда расмийлаштирилган баённомалар асосида балллар ҳисоблана бошланган. 2026 йил 1 апрелдан эса фото ва видеорадарлар орқали қайд этилган айрим қоидабузарликлар учун ҳам балл қўшиш амалиёти йўлга қўйилди.
Қонунчиликка кўра, Маъмурий жавобгарлик тўғрисидаги кодекснинг 34-1-моддасига асосан, бир йил давомида 12 баллга етган ҳайдовчилар камида 6 ой муддатга транспорт воситаларини бошқариш ҳуқуқидан маҳрум этилади.
Шу тариқа, янги тизим қоидаларга амал қилишни янада қатъий назорат қилишга қаратилган. Энди савол — ҳайдовчилар бу талабларга қай даражада мослашади? Акс ҳолда, жазо муқаррар.
“Zamin”ни Telegram'да ўқинг!
