Тез ёрдамга келган ғалати чақириқ барчани ҳайратга солди

Тез тиббий ёрдам ходимларидан бири тунги навбатчилик вақтида юз берган ноодатий воқеа ҳақида сўзлаб берди. Унинг айтишича, тунги соат 01:00 лар атрофида психиатрия бригадасига кутилмаган мазмундаги чақириқ келиб тушган.

Қўнғироқ қилган аёлнинг айтишича, унинг 12 ёшли фарзанди дори ичишни рад этган. Шундан сўнг у шифокорлардан уйига келиб, болани "Дорини ичмасанг, қўл-оёғингни боғлаб олиб кетамиз", дея қўрқитиб кетишни сўраган. Бироқ тез тиббий ёрдам ходимлари бундай вазифа уларнинг фаолиятига кирмаслигини таъкидлаган.

Мазкур воқеа акс этган видео ижтимоий тармоқларда кенг тарқалиб, фойдаланувчилар ўртасида қизғин муҳокамаларга сабаб бўлди. Кўпчилик бундай асоссиз чақириқлар шифокорларнинг қимматли вақтини олиши ва ҳақиқатан ҳам шошилинч ёрдамга муҳтож беморларга кечикишга сабаб бўлиши мумкинлигини таъкидлади.

Изоҳларда энг кўп қўллаб-қувватланган фикрлардан бирида эса тез тиббий ёрдам хизматини асоссиз чақирган фуқароларга нисбатан жарима ёки бошқа жавобгарлик чораларини жорий этиш кераклиги қайд этилган.