Чироқчида ёш она 18 марта пичоқлаб ўлдирилди

Қашқадарё вилоятининг Чироқчи туманида оилавий можаро мудҳиш фожиа билан якунланди. Суд ҳужжатларига кўра, 2001 йилда туғилган эркак 2023 йил октабр ойида турмуш қурган бўлса-да, оиладаги келишмовчиликлар сабаб 2026 йил 28 январ куни турмуш ўртоғи чақалоғини олиб ота-онасиникига кўчиб кетган.

Маълум бўлишича, аёл эрига энди у билан бирга яшашни истамаслигини, оилани моддий жиҳатдан таъминламаётгани сабаб ажрашишга қарор қилганини билдирган. Орадан икки ҳафта ўтгач, эркак яширинча балкон орқали аёл яшаётган уйга кирган. У турмуш ўртоғини бошқа эркак билан телефонда гаплашаётганидан гумон қилиб, телефонининг паролини очишни талаб қилган.

Аёл бунга рози бўлмагач, эркак аввал уни аёвсиз калтаклаб, юз, бош ва танасининг турли қисмларига зарба берган, натижада жабрланувчининг жағ суяги синган. Шундан сўнг у ошхонадан пичоқ олиб чиқиб, аёлнинг кураги, бели ва бошқа тана қисмларига жами 18 маротаба пичоқ урган. Оғир тан жароҳатлари оқибатида ёш она воқеа жойида вафот этган.

Аниқланишича, ушбу мудҳиш жиноят уларнинг 2024 йил 18 июльда туғилган вояга етмаган фарзанди кўз ўнгида содир этилган.

Жиноят ишлари бўйича Чироқчи туман суди эркакни қасддан одам ўлдиришда айбдор деб топиб, 17 йил муддатга озодликдан маҳрум қилди. Шунингдек, суд ҳукмига кўра, марҳуманинг қонуний вакили фойдасига 100 миллион сўм миқдорида маънавий зарар ундирилиши белгиланди.