Пластик карточкалардан пул ўғирлаш билан шуғулланган фирибгарлар қўлга олинди

Сирдарё вилоятида истиқомат қилувчи (исми-шарифи негадир сир тутилган) фирибгар ва компьютер устаси вирусли компьютер дастури яратиб, уни «Play Market»га жойлаштирган. Ана энди бу ердан дастурни кўчириб олиб очганлар, агар зудлик билан пластик карточка орқали 10 минг сўм тўланмаса, телефон блокка тушиши ҳақидаги хабарга дуч келишган. Шубҳасиз, қўрқиб кетади одам. Негаки, кимдадир «Айфон», яна бошқада «Галакси» каби қимматбаҳо телефонлар бўлиши мумкин-ку! Дарров талаб қилинган 10 минг сўмни тўлайди-ю, гўёки енгил тортади.

Бироқ пул тўлангани ҳақида унга шубҳали рақамдан хабар етказилади. Фирибгар учун сиз пластик карточкангиздан пул кўчирганингизнинг ўзи етарли. Энди у сизга мурожаат этиб вақт йўқотмайди. Чунки пластик карточка пароли ва рақамларини ўзининг вирус дастури ёрдамида компьютерига сақлаб олган. Бемалол пулларингизни тортиб олаверади. Мутахассисларнинг айтишича, бу фириб «Click-бот» орқали амалга оширилган.

Бироқ бу биринчи фирибгарлик эмас. Яна бир республикамиз аҳлини алдаб, қўрқитиб пул ишлаш билан шуғулланган фирибгар «Oson» кўмагида ўз жиноятларини амалга ошириб келган. У ўзганинг пластик карточкасини хайрия йиғувчи дастурга боғлаб олиб, пул ишлайверган ва бу пулларни ўз манфаати учун ишлатаверган.

Ҳозирда иккала фирибгар ҳам қўлга олинган. Ушбу факт юзасидан жиноий иш қўзғатилган.

Манба: Hordiq.uz

Янгиликлар