“Султон куёв”

Яқин қариндошим ўғил уйлантирадиган бўлди. Олдин совчиликка бордик. Бир тўй бўлди. «Нон синдирар» қилишди. Бир тўй бўлди. Фотиҳа бўлди. Бир тўй бўлди. Ҳаммаси ресторанда. Ҳаммасида таниқли хонандалар хизматда бўлди. «Инсоф билан, қариндош, жуда тўй кўпайиб кетмаяптими?» десам «Э, ишингиз бўлмасин, қудаларим чет элдан долларни супуриб олиб келишяпти, давлати камайиб қолмайди», – деди.

Тўйдан олдин қариндошникига борсам, ҳовли адоғидаги бир уй, бир даҳлизга кўчиб ўтишибди. Тўрт хонали катта уйни шип-шийдам қилиб қўйишибди, на гилам бор, на парда. «Ҳа, уйларинг­га ўғри тушдими?» сўрадим ажабланиб. «Келинга бўшатиб бердик, бир тўлдириб, жиҳозласин», – деди қариндошим.

Ҳақиқатдан ҳам, келин томондан келган одамлар бир ҳафта меҳнат қилиб, тўртта уйни ҳам мебель, гиламлар билан тўлдиришди, пардалар илишди. Уларнинг бошида туриб, қўлини белига тираб олган қариндошимнинг аёли ҳали уни, ҳали буни буюришдан чарчамас эди. Унинг топшириғи билан энг сўнгги русумдаги телевизор, кир ювиш машинаси, чангюткич, дазмол, электр гўшт қиймалагич, электр духовка, микротўлқинли печ, сок сиқадиган машина, ошхона комбайни деган нарсаларни келтиришди. Бир юк машина идиш-товоқ келган куни бориб қолиб, оғзим очилиб қолди. «Коса-товоқ, чойнак-пиё­лалар тўпламидан ташқари, уларнинг ичида чой қошиғу, сабзи тўғрайдиган тахтагача бор эди. Янги газ плитаси олдиришганини кўриб, одамнинг нафси ҳеч қачон тўймаслигига амин бўлдим.

Хуллас, тўй ҳам бўлди. Тўйдан кейин қариндошим яна ўз уйига қайтди. Келин олиб келган диванларда маликалардек ястаниб, келиндорлик қилишни бошлади. «Келин, манти егим келяпти. Келин, палов ейман. Келин, чарчаб келдим, оёқ-қўлларимни бир уқалаб қўйинг!...»

Келин болали бўлганда қудалар куёвларининг ишёқмаслиги ва таъмагирлигини билиб қолишди. Болага бериладиган гўдаклар овқатини ҳам «Отангга айт, отанг олиб берсин», дейиши уларнинг сабр косасини тўлдирди.

Мухбир сифатида каминани ҳам музокарага чақиришди. Мен қариндошимнинг ўғлига насиҳат қилмоқчи бўлиб, «Жиян, севиб уйланган эдингиз, энди ҳурматини қилсангиз, ҳеч бўлмаса, ўзингизнинг гўдагингиз ейдиган овқатни олиб келиб берсангиз бўлмайдими?» десам, кўзимга бақрайиб туриб, «Қанақа севги? Мен буларнинг бойлиги учун қизларига уйланганман. Қизлари тўйдан кейин бизни ҳам Америкага юборишади, дегани учун уйланганман. Ўзим болага бўтқа олиб келадиган бўлсам, «простойроқ» одамнинг қизини ҳам олиб қўяверар эдим».

«Султон куёв»нинг ана шу гапи қайнотасининг сабр косасини тошириб юбормади, синдирди. Тўртта юк машинаси ва мардикорларни олиб келиб, қариндошимнинг уйини тўйдан олдин мен кўргандек қилиб, «яланғочлаб» кетди. Энди ростдан ҳам қариндошимнинг уйи ўғри ургандек бўлиб қолди...

Манба: Azon.uz «Замин»ни Telegram’да ўқинг!