Тошкент шаҳар ҳокими Жаҳонгир Ортиқхўжаев, ҳокимликда ташкил этилган ОАВ вакиллари билан учрашувда, айрим масалалар моҳияти, мантиғини тушуна олмаётганини билдирди. У Kun.uz мухбирининг саволига жавобан, бюджет даромадларининг орттириб бажарилган қисмининг 10 фоизи хусусида шаҳарликларга хабар берилишини маълум қилиб, бюджетга пул бериб, давлат дастурлари ижроси учун унинг бир қисмини олиш муаммо бўлаётганини айтди.
«Бир йили икки ойдан бери ҳоким сифатида ишлаяпман. Аммо тушунмаётган нарсаларим жуда кўп. Тошкент шаҳри республика бюджетининг 25 фоизи, яъни тўртдан бирини беради. Бу 20 трлн сўм. Менинг ҳоким бўлиб тушунмаган нарсам шуки, Президент ташрифлари чоғида дастурлар ишлаб чиқилади, протоколлар тузилади.
Ҳокимликни бирорта корхона ёки ташкилотга қиёсласак, шу корхона раҳбари дастурдаги ишларни бажаришга керак бўладиган пулни олиш учун пул берувчининг эшигига бориб ялиниши керак. Бу қандай мантиққа тўғри келишини тушунмаяпман.
Мен бизнесдан чиққанман. Кўп фабрикаларимиз бўларди. Эрталаб ишимни каттароқ даромад бераётган фабрикадан бошлардим. Кириб, «эй дўстим, жаноб фалончи, янада кўпроқ даромад олишимиз учун биздан қандай ёрдам керак, нима қилишимиз, қанча инвестиция тикишимиз керак», деб йигитлардан илтимос қилардим. Бу ерда ҳам пул бераркансан, ҳам дастурга кирган пулнинг 1/6 қисмини олиш учун эрталабдан кечгача сарғайиб ўтирар экансан, илтимос қилиб. Мана шу масаланинг мантиғини ҳамон тушунганим йўқ.
Мен тўғрисини айтаман, 1 млрд сўм солиқ тўлаганни олдига бориб, раҳмат сенга деб, телевизор ёки ширинликми, совға қилиб, хабар олиб келяпмиз. Биз солиқларни йиғиб берамиз, республика дастурига, Президентимизнинг дастурига кирган 1/6 қисм пулимизни олиш учун иккита одамим эрталабдан кечгача, эшигининг тагида сарғайиб ўтиради: илтимос, берган пулимиздан дастурга кирган вазифаларни бажаришимиз учун пул беринг деб.
Биз ахир қон сўрувчи эмас, қон берувчимиз. Биз бориб ялинишимиз керакми, дастурга тушганларга пул бергин, деб ёки уларми? Мен ҳеч кимнинг ялинишини хоҳламайман. Аммо, ўз пулингни олишинг учун, эшик тагида сарғайиб, акажон, сизнинг қачон вақтингиз бўлади, қачон қабулингизга кирсам бўлади? Мактаб қуриш керак, боғча қуриш керак. Дизелга пулимиз йўқ, эртага эрталаб транспорт йўлга чиқмайди. Шифохонамизда оддий аналгин-димедролга пулимиз қолмаган. Ҳам пул берамиз, ҳам ялинамиз.
Биз уларнинг эшиги тагидан иш бошлашимиз керакми, ёки улар бизнинг эшигимиз тагидан иш бошлаши керакми, билмадим. Мен бу гапларим учун гап эшитсам керак. Лекин, бу масалани очиқчасига тартибга туширмасак, мен тушунмаяпман. Инвестиция бўйича ўринбосарим ҳам, молия бошқармаси роса гап эшитишини ҳам биламан, раҳбариятларидан», - деди Ортиққхўжаев.
У мазкур фикрларни билдирар экан, ОАВ вакилларига мурожаат қилиб, 20 трлн сўмдан атиги 3,5 трлн сўмни қайтариб оламиз, аммо шуни олиш учун эрталабдан кечгача сарғайиб туриш мантиққа тўғри келадими, деган савол билан жавоб қайтарди.
У янглиш фикрлаётган бўлиши мумкинлигини таъкидлар экан, ҳокимликларнинг солиқ йиғишга манфаати бўлиши кераклигини қайд этди. Ортиқхўжаевга кўра, вақти ўтиши билан бу масала моҳиятини ҳам тушуниб олар, аммо ҳақиқатни, бор гапни айтгани учун танбеҳ эшитиши эҳтимолини яширмади. “Замин” янгиликларини “Инстаграм”да кузатиб боринг
Ctrl
Enter
Хато топдИнгизми?
Иборани ажратиб Ctrl+Enter тугмасини босингМавзуга оид янгиликлар
Орзудаги уй — қишда иссиқ, ёзда салқин. Бунга қандай эришиш мумкин?
Ўзбекистонлик 17 ёшли қиз дунёнинг етакчи университети олимлари билан тадқиқот олиб бормоқда
Мессининг салкам 1 миллион долларга сотилган салфеткаси ҳақида
Жиззахда учта юк машинаси иштирокида ЙТҲ содир бўлди
Пневматик қуролларни ўз ихтиёри билан топширганлар жавобгарликдан озод этилади
Ўзбекистонликлар доимий яшаш учун кўпроқ қайси давлатларга кўчиб кетмоқда?
Шимолий Корея янги кўрсаткичларга эга баллистик ракетани синовдан ўтказди
Украина президенти маҳбусларни сафарбар қилиш тўғрисидаги қонунни имзолади
