Директор ўринбосари ўқувчини иккинчи қаватдан итариб юборганликда гумонланмоқда

^{Фото: Видеолавҳадан скриншот}
Иштиҳонлик ўқувчини ўзи таҳсил олаётган мактаб директори ўринбосари уриб, тан жароҳати етказганлиги ҳақида ижтимоий тармоқларда тарқалган хабарлар юзасида Бош прокуратура маълумот берди.

Маҳкама матбуот хизмати раҳбари Ҳаёт Шамсутдиновнинг «Xabar.uz»га маълум қилишича, 2019 йилнинг 28 декабрь куни 13-00 ларда вояга етмаган С.Қ. Самарқанд вилояти, Иштиҳон тумани тиббиёт бирлашмасига ёпиқ КЦТ, бош мия чайқалиши, ўнг билак суякларининг дистал охиридан ёпиқ синиб силжиши, чап чакка, ёноқ ва кўз атрофи юмшоқ тўқимасининг лат ейиши каби тан жароҳатлари билан олиб келинган.

Шифокорлар томонидан беморга биринчи тиббий ёрдам кўрсатилгач, касаллик тарихи очилади ва у шифохонага ётқизилган.

С.Қ.га юритилган касаллик тарихида отаси Д.П. ўғлидаги тан жароҳатлар (2019 йил 28 декабрь куни) мактаб зинасидан йиқилиб тушгани натижаси экани, ушбу ҳолат юзасидан бирор кишига нисбатан даъвоси йўқлиги ҳақида (28.12.2019 йил куни берган) тилхати мавжуд. Шунингдек, онаси Ё.У. ҳамда бобоси А.П. ҳам ўз тилхатларида вояга етмаган С.Қ.нинг тан жароҳатларни ўзи йиқилиб олганлигини тасдиқлашган.

2020 йил 3 январь куни телеграмдаги @BUGUNUZ каналида берилган видеода Иштиҳон туман «Муротобод» МФЙ Чамбил қишлоғида яшовчи 08.06.2003 йилда туғилган, туман ХТБга қарашли 3-умумий ўрта таълим мактаби 10-синф ўқувчиси С.Қ. олган жароҳатлар у таҳсил олаётган мактаб директори ўринбосари А.Р. томонидан етказилганлиги баён қилинади.

Мазкур ҳолат юзасидан ўтказилаётган дастлабки текширишда вояга етмаган С.Қ. билан (отаси Д.П. ва туман ХТБ психологи М.Э.лар иштирокида) суҳбат ўтказилганда, у қўйидагиларни маълум қилди. Яъни, 2019 йил 28 декабрь куни соат 12:30 ларда ўзи ўқиётган мактаб ҳовлисида ўтказилган янги йил байрами якунида паққиллаган баланд овоздан сўнг мактабнинг кириш йўлагида директор ўринбосари А.Р. ундан «Бу нимани овози?» деб сўраганида, «билмайман» деб жавоб беришига қарамасдан, (А.Р. унининг юзига тарсаки тушириб) хонасига олиб чиққанлигини ҳамда (хонада ҳам бир маротаба юзига) тарсаки туширганлигини ва ойна ёнига келганида (А.Р. уни) туртиб юборганлиги оқибатида иккинчи қаватдан ерга йиқилиб тушганлигини баён қилди.

2020 йил 3 январь куни вояга етмаган С.Қ.нинг отаси Д.П. туман ИИБ бошлиғи номига фарзандининг тан жароҳати олганлиги ҳолати юзсидан ариза билан мурожаат қилган. Унинг мурожаати туман ИИБда рўйхатга олиниб, ҳозирда терговга қадар текширув ҳаракатлари олиб борилмоқда. “Замин” янгиликларини “Twitter”да кузатиб боринг