Эр-хотинни ўлдириб, фарзандининг оғзини скотчлаб кетганлар шу хонадонда ишлаган усталар бўлиб чиқди

Жорий йилнинг 6 январь куни Қўқонда эр-хотин ўз ётоқхонасида ўлдирилиб, фарзандининг оғзини скотчлаб кетилгани ҳақида хабар берилганди. «Севимли» телеканалининг «Замон» информацион дастурида маълум қилинишича, қотилларнинг шахси аниқланган.

Жиноятчиларнинг шахсини аниқлаш учун уйга яқинроқ жойларга ўрнатилган видеокамераларда муҳрланган тасвирлардан фойдаланилган. Унда ўша қотиллик рўй берган куни хонадон атрофида нотаниш Matiz айланиб юргани акс этган. Тергов жараёнида эса қотиллар ана шу машина ичидаги 3 нафар шахс бўлиб чиқди. Уларнинг мақсади эса шу уйдан пул ўмариш бўлган.

Аниқланишича, қотиллик Ўзбекистон туманида яшовчи Matiz автомобилининг эгаси, унинг Овчи ва Хонобод қишлоғида яшовчи икки дўсти билан амалга оширилган.
Ўғрилар хонадонга кирганида уй эгалари уйғониб кетган ва жиноятчилар уларни пичоқ билан ўлдиришга мажбур бўлган.

Маълумотларга кўра, қотилликда гумонланаётган шахслар 2019 йилнинг март-апрель ойларида шу хонадонда қурилиш-таъмирлаш ишларини олиб борган. Улар ишлаб юрган кезларида уй эгасининг телефон орқали кимлар биландир гаплашганини ва унда уйда катта миқдордаги пул борлигини эшитиб қолишган. «Замин»ни Telegram’да ўқинг!