Баҳор асли нимадан бошланади?

Баҳорни негадир чақалоқнинг илк нимтабассумига ўхшатаман.Аслида ҳам шундай эмасми?! Чунки,чақалоқлик инсон умр ниҳолининг куртаги бўлса, баҳор табиатнинг қайта туғилишидир. Яна у болалик орзуси, самоларга ошиқаётган варракнинг парвози, нуроний кексаларимиз дили ва тилидаги шукроналик, эриётган музликлар-у жўшаётган иштиёқлар нафаси , табиат ва борлиқнинг пок-покиза юзига ўхшайди.

Хўш... баҳор ўзи қандай бошланади ?

Баҳор бойчечакдан бошланади! Бойчечак баҳор келганини айтишга шунчалик шошадики ,қор тагидан мўралаб , уни ёриб чиқиб , қуёш томон ошиқади ва бутун оламга кўклам келганини жар солади!Қуёш ҳам унинг жасоратига қойил қолиб , гоҳ очиқ осмондан, гоҳида қуюқ булутлар орасидан меҳр билан нурини сочади.Тез орада қиш қиличлари — сумалаклар томчи-томчи ёш тўкади! Аммо уларнинг-да ҳаёти тугамайди. Шошқин жилға, сой сувларига қўшилиб, тошдан тошга урилиб, яшнатувчилик хизматига шошилади.Сўнгра бодроқдек бодом гулларидан сўнг бирин-кетин ўрик,олчаю гилослар қувлашиб дарахт-гулзорга айланади, ҳар бири гўёки қувонч кўзларини очади!

Қалдирғоч овозини кўклам мадҳиясига қиёслайман. У бу бетакрор мусиқасини ўзи қўналға қилган уйга севинч-ла етказади!

Қалбларни ошиқтирувчи ва яшартирувчи баҳорнинг илиқ , самимий ва хушбўй еллари борлиқни ўйғотади! Майсалар аввал эринчоқлик билан кейин эса ғайратла бўй кўрсата бошлайди...

... Ва яна бир бор она табиат ёшлик ва гўзаллик деб аталмиш энг буюк суратини чизади!

Маърифат ИСКАНДАРОВА.

Янгиликлар