Ўзбекистонликларга мурожаат: «Коронавирусга қарши карантин қоидаларига риоя қилинг!»

Ўзбекистонга коронавируснинг кириб келиши ва тарқалишининг олдини олиш бўйича махсус комиссия фуқароларга мурожаат йўллади. «Коронавирус тарқалиши олдини олишнинг энг муҳим шарти — карантин қоидаларига қатъий ва истисноларсиз риоя этишдир», — дейилади унда.

Мурожаатнинг тўлиқ матни билан қуйида танишиш мумкин:

Чет элдан қайтиб келаётган ватандошларимиз, фаолиятида чекловлар ўрнатилган ташкилотлар ва муассасалар, тадбиркорлик субъэктлари ва умуман мазкур чекловлар тегишли бўлган барча-барча субъэктлар, жисмоний ва мансабдор шахслар давлат томонидан белгиланган карантин қоидалари ва талабларини сўзсиз бажаришларини қатъий сўраймиз.

Амалга оширилаётган кенг қамровли тушунтириш ишлари ва чоралар, жумладан мураккаб шароитда ва тезкор равишда чет элдан қайтиб келаётган кўп сонли ватандошларимиз учун Республика ҳудудларида шароитлар яратилганига қарамасдан, 20 март куни Самарқанд вилоятида карантинга олинган маскандан икки фуқаро қочиб кетган.

Ўзининг бундай масъулиятсиз хатти-ҳаракати билан бу фуқаролар бошқаларнинг ва яқинларининг ҳаётини хавфга қўйган ва бу билан Ўзбекистон қонунларини қўпол равишда бузган. Бу фуқаролар ҳозирда ушланган ва изоляция қилинган. Уларга нисбатан жиноий иш қўзғатилган.

Шу муносабат билан яна бир марта барчани алоҳида огоҳлантирамиз ҳамда ўз ҳаракатингиз билан нафақат ўзингиз, балки оила аъзоларингиз ва халқимизга зиён етказишингиз мумкинлигини доимо эсда тутишингизни сўраймиз.

Санитарияга оид қонун ҳужжатларини ёки эпидемияга қарши кураш қоидаларини бузганлик учун Ўзбекистон қонунчилигида жуда қаттиқ жавобгарлик чоралари кўзда тутилган. Жиноят кодексига асосан шундай ҳуқуқбузарликларга йўл қўйган шахслар 8 йилгача озодликдан маҳрум қилиш билан жазоланиши мумкин.

Вирус кенг тарқалишининг олдини олиш учун фуқаролар жамоат жойларига иложи борича чиқмаслиги, ўз ҳаракатланишини кескин чеклаши ва умуман олганда жамиятда одамлар орасида масофа сақлаши зарур.

Ҳурматли фуқаролар, барча қоида ва чекловларга тартибли равишда амал қилинсагина, тегишли ташкилотлар талаби қатъий бажарилсагина, бутун дунёда тарқалаётган бу вирусга қарши биргаликдаги, ҳамжиҳатликдаги курашимиз самара беради. Барчангизни шунга чақирамиз.

Ўз навбатида, тегишли мутасадди масъул идоралар, ҳуқуқни муҳофаза қилувчи органлар раҳбарлари ва ходимлари карантин билан боғлиқ талабларга риоя этилишини 24 соат таъминлаб борилишига шахсан жавобгарлигини таъкидлаймиз.

«Замин» янгиликларини «Вконтакти»да кузатиб боринг