Хорижлик шифокор Ўзбекистонда коронавирусга қарши курашда кўнгилли бўлиш истагини билдирди

Покистонлик шифокорнинг президентга мурожаати Соғлиқни сақлаш вазирлиги томонидан ўрганилган ва у пойтахт ёки вилоятларга жалб қилиниш учун шакллантирилаётган волонтёрлар рўйхатига киритилган.

2014 йилда Қирғизистон Халқаро университетида врач мутахассислигига эга бўлган ва кейинчалик Марказий Осиё Америка университети, шунингдек, Италия, Ливан, Хитой каби давлатларда тажриба орттирган, айни пайтда Халқаро Вестминстер университетида тижорат ҳуқуқи бўйича катта ўқитувчи бўлиб ишлаётган доктор Аммар Юнас волонтёр бўлиб ишлаш бўйича Ўзбекистон Республикаси президентига мурожаат қилди.

«Коронавирус инфекцияси пандемия тусини олди. Ўзбекистоннинг бу касалликка қарши курашдаги салоҳиятига шубҳам йўқ. Менинг тажрибам бу касалликка қарши курашда қўл келади, деб ўйлайман. Рус тилини яхши биламан, Ўзбекистон ва Покистон маданияти ўртасида ўхшаш жиҳатлар ҳам кўп. Мен камтарона хизматимни таклиф қилишдан мамнунман, қайси ҳудудга жўнатишларининг фарқи йўқ» дейди шифокор ўз мурожаатида.

Бу мурожаат Соғлиқни сақлаш вазирлиги томонидан ўрганилган ва унга пойтахт ёки вилоятларга жалб қилиниш учун шакллантирилаётган волонтёрлар рўйхатига, эҳтиёждан келиб чиқиб тузиладиган кўнгиллилар захирасига киритилганлиги тўғрисида ёзма равишда маълум қилинган. «Замин»ни Telegram’да ўқинг!