Хизмат кўрсатиш соҳасидаги тадбиркорлик субъектларига кредитлар ажратилади

Президентнинг “Хизматлар соҳасини қўллаб-қувватлаш чора-тадбирлари тўғрисида”ги қарори имзоланди.
Қарорда кўрсатилишича, хизматлар соҳасини ривожлантириш учун тижорат банкларига Тикланиш ва тараққиёт жамғармасидан 100 миллион АҚШ доллари эквивалентида кредит линияси ажратилади.

Ҳужжатда белгиланишича:

• кредит линияси тижорат банкларига 7 йил муддатга, шу жумладан З йиллик имтиёзли даври билан фоиз ставкаси Ўзбекисгон Республикаси Марказий банкининг асосий ставкасидан 4 фоиз паст қилиб берилади;
  
• тижорат банклари томонидан кредитлар хизмат кўрсатиш соҳасидаги тадбиркорлик субъектларига, айниқса маиший, таълим, тиббий, ахборот-коммуникация ва бошқа талаб юқори бўлган соҳаларда фаолият кўрсатадиган корхоналарни ташкил этиш (молия ва савдо соҳаларидаги тадбиркорлик субъектлари бундан мустасно) ва жиҳозлаш учун Марказий банкнинг асосий ставкаси бўйича 1 миллиард сўмгача миқдорда ажратилади;
  
• мазкур қарорда назарда тутилган кредит линияси маблағларининг камида 20 фоизи аёллар ва ёш тадбиркорларга ажратилади;
  
• Ўзбекистон президентининг 2020 йил 8 июндаги “Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида”ги ПҚ-4742-сон қарори билан ўзини ўзи банд қилган шахслар шуғулланиши мумкин бўлган 67 та фаолият (ишлар ва хизматлар) турлари учун “Ҳар бир оила - тадбиркор” дастури доирасида кредитлар ажратилади.

«Замин»ни Telegram’да ўқинг!