15:16 / 24.07.2020
1 514

Нeгa дopиxoнaдa эмac, «қўлдa»?..

Нeгa дopиxoнaдa эмac, «қўлдa»?..
Пандемия туфайли айни вақтда дориларга талаб ошди. Бундан эса айрим ноинсоф кимсалар фойдаланиб қолишга ҳаракат қилмоқда. Дорилар нархи сунъий оширилишининг олдини олиш мақсадида Бош прокуратура ҳузуридаги департаментининг Тошкент вилояти бошқармаси ходимлари томонидан бир нечта тезкор тадбир ўтказилди.

Уларда қалбаки, сифатсиз дорилар ва тиббий буюмларнинг ноқонуний савдоси билан боғлиқ 10 та жиноят фош этилиб, 930 млн. сўмлик дори-дармон ва тиббий буюмлар далилий ашё тариқасида олиб қўйилди.

Чет элда ишлаб чиқарилган дориларни юртимизга яширинча олиб кириш юзасидан иккита жиноят иши қўзғатилган. Хусусан, Бекобод шаҳар бўлими ходимлари Тошкент вилояти божхона бошқармаси ходимлари билан ҳамкорликда Бекобод шаҳар Сирдарё кўчасида яшовчи А.Х.нинг хонадонини кўздан кечирганда хорижда ишлаб чиқарилган ва Ўзбекистонга ноқонуний олиб кирилган 319,3 млн. сўмлик 254 дона «Блокиум В-12» ампуласи, 112 дона «Блокиум гель 50 гр», 114 дона «Фактор A-G 30 мл», 861 конвалюта «Блокиум флекс», 977 конвалюта «Кариер мемантин 10 мг», 3729 дона «Рокит цитрат калия», 18 дона «Бигетрик» дориси борлиги аниқланиб, ашёвий далил сифатида олиб қўйилди ва жиноят иши қўзғатилди.

Департаментнинг Тошкент тумани бўлими ва вилоят божхона бошқармаси ходимлари ҳамкорликда ўтказган тадбирда фуқаро Б.К. ўзининг таниши А.И. билан биргаликда фуқаро Б.Э.га Андижон вилоятидан Тошкент туманига кучли таъсир қилувчи моддалар рўйхатига киритилган 327,4 млн. сўмлик 6600 дона «Тропикамид» ва 8400 дона «Regapen» дориларини сотиш мақсадида бериб юборгани аниқланган. Мазкур ҳолат юзасидан ҳам жиноят иши қўзғатилди.

Ҳозирги кунда дорихоналарни коронавирусга қарши дорилар билан тўлиқ таъминлаш чоралари кўрилаяпти. «Плаквинил», «Авирол», «Арбидол», «Рибаверин», «Рекутан», «Аналгин», «Эргоферон» каби дориларнинг ноқонуний савдосига қарши тезкор тадбирлар ўтказилмоқда.

Хусусан, департаментнинг Чирчиқ шаҳар бўлими ходимлари ўтказган тезкор тадбирда М.С. исмли шахс 30 қути «Эргоферон» дорисини 3 млн. 150 минг сўмга сотган вақтида ушланди. Бундан ташқари, унинг «Спарк» автомашинаси кўздан кечирилганда, унда яна 6 қути «Эргоферон» дориси борлиги аниқланди. Тадбир сўнгида 36 қути дори ашёвий далил тариқасида олиниб ҳужжатлар расмийлаштирилди.

Департаментнинг Юқоричирчиқ тумани бўлими ходимлари ўтказган тезкор тадбирда Т.Р. ва Р.С. Россияда ишлаб чиқарилган «Арбидол» дорисининг ҳар қутисини 350 минг сўмдан ҳисоблаб сотаётганда ноқонуний савдога чек қўйилди.

Ҳозир Тошкент вилоятидаги дорихоналарда дори ва тиббий буюмларнинг нархини оширмаслик бўйича профилактик суҳбатлар ўтказилмоқда. Нархларнинг барқарорлигини таъминлаш чоралари кўрилаяпти.

Гулчеҳра Раззоқова,
департаментнинг Тошкент вилояти
бошқармаси катта инспектори
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)