Ўхшаш аломатлар. Коронавирус билан гриппни қандай фарқлаш мумкин?

^{Фото: «Stihi.ru»}
Саволга Соғлиқни сақлаш вазирлиги ҳузуридаги Коронавирусга қарши курашиш штаби аъзоси, тиббиёт фанлари номзоди Севара Убайдуллева жавоб берди. Бу ҳақда ССВ маълум қилди.

Коронавирус ва гриппнинг бир-биридан ажратувчи бир қанча белгилари мавжуд. Жумладан, касалланган бемор билан мулоқотда бўлсангиз, грипп касаллигининг яширин даври 5-7 кун, коронавируснинг яширин даври эса 2-14 кун.

Икки касаллик ҳам тумов, кўз ёшланиши, бурун оқиши, акса уриш, тана ҳароратининг кўтарилиши билан кечади.

Лекин грипп касаллигида:

умумий белгилар 1-3 кунгача бўлади. Енгил даражасида тана ҳароратининг 38 даражадан юқори бўлиши бир марта кузатилади, 3-кундан бошлаб бемор аҳволи яхшилана бошлайди;
гриппнинг оғир кечувида касаллик бронхлар ва ўпкаларни жароҳатлаган бўлса, грипп оқибатида кузатиладиган тана ҳарорати 5 кундан кейин ҳам 38 даражадан юқори бўлиши мумкин, ундан кўп муддат кузатилмайди. Грипп касаллигида йўтал биринчи 3-4 кун қуруқ, сўнгра эса балғамли бўлади ва даволашда асосий мақсад балғамни парчалаш ёки кўчиришга кўмаклашишдир;
грипп касаллигидаги пневмонияда ўпка яллиғланиши касалликнинг реабилитация жараёнида қайта тикланиши мумкин. Грипп касаллиги фақат юқори ва пастки нафас йўлларини зарарлайди. Грипп касаллигида асаб тизимининг жароҳатланиши кузатилмайди.

Коронавирус касаллигида эса:

умумий белгилар 1-3 кун кузатилади, тана ҳарорати енгил кечувида 38 даражага бир марта кўтарилади. Сўнгра 37 даражада бўлади. Енгил кечувида даво тўғри олиб борилса, бемор аҳволи касалликнинг 5-7-кунларида яхшиланиб боради;
касалликнинг оғир кечувида эса 8-кундан бошлаб тана ҳарорати 39-40 даражагача кўтарилади. Умумий ҳолсизлик кучаяди, қуруқ йўтал зўраяди, нафас етишмовчилиги, яъни ҳансираш ҳам кучаяди. Коронавирусда йўтал балғамсиз бўлади. У касалликнинг кечувига боғлиқ ҳолда 2-3 ҳафтадан 1,5 ойгача кузатилиши мумкин;
коронавирусдаги йўтални даволаш кўпроқ нафас машқларини ўтказиб, алвеолаларнинг фаолиятини тўлиқ таъминлаш билан организмнинг тўқима ва ҳужайраларига кислород таъминотини тиклашга қаратилган бўлади;
коронавирус касаллигининг оғир ва ўта оғир кечувида ўпкалар интерстицияси, алвеолаларининг фиброз тўқима билан қопланиши ойлар давомида тикланиши ёки маълум қисми умуман тикланмаслиги ҳам мумкин;
коронавирус касаллигида инсон организмининг бир неча аъзолари (нафас аъзолари, ошқозон-ичак тизими аъзолари, юрак-қон томир тизими аъзолари, буйрак тизими, эндокрин безлар тизими, марказий ва периферик асаб тизими касалликлари жароҳатланади. Айниқса, асаб тизими ва руҳиятнинг зарарланиши кузатилади.