13:00 / 07.10.2020
965

Ўзбекистондаги ўқитувчи ва тиббиёт ходимларини гриппга қарши эмлаш учун Россиядан 1 млн доза вакцина сотиб олинади

Ўзбекистондаги ўқитувчи ва тиббиёт ходимларини гриппга қарши эмлаш учун Россиядан 1 млн доза вакцина сотиб олинади
Ўзбекистондаги ўқитувчилар ва тиббиёт ходимларини гриппга қарши эмлаш учун Россия компаниялари томонидан ишлаб чиқарилган гриппга қарши вакцинадан бир миллион доза харид қилиш режалаштирилмоқда. Бу ҳақда Соғлиқни сақлаш вазирлиги хабар берди.

Вазирлик томонидан маълум қилинишича, Ўзбекистон Президентининг 2020 йил 26 августдаги «Аҳолини ижтимоий қўллаб-қувватлашга қаратилган қўшимча чора-тадбирлар тўғрисида»ги қарорида мамлакатдаги барча мактабгача таълим, бошланғич, умумий ўрта таълим ва соғлиқни сақлаш муассасаларининг ходимлари марказлашган тартибда гриппга қарши эмланиши кўзда тутилган. Уларни эмлаш бўйича ушбу қарор ижросини таъминлаш мақсадида айни кунларда ишлар давом этмоқда.

Хабар берилишича, «Дори-дармон» акциядорлик жамияти Россиянинг гриппга қарши вакцина ишлаб чиқарувчилари билан бир миллион дозадан ортиқ гриппга қарши вакцинани харид қилиш бўйича шартнома тузган. Ҳозирда «Совигрипп» вакцинасининг 250 минг дозаси Ўзбекистон ҳудудларига етказиб берилган.

Бундан ташқари, 15 октябрга қадар 40 минг доза, 30 октябрга қадар 250 минг доза, ноябрь ойида эса 500 минг доза «Флю-М» вакцинасини етказиб бериш мўлжалланган.

Эслатиб ўтамиз, Ўзбекистон Президентининг 2020 йил 26 августдаги «Аҳолини ижтимоий қўллаб-қувватлашга қаратилган қўшимча чора-тадбирлар тўғрисида»ги қарорида мамлакатдаги умумий ўрта таълим муассасалари ходимлари 1 октябрга қадар гриппга қарши эмланиши бегилаб қўйилганди.

Тошкент шаҳар Санитария-эпидемиологик осойишталик маркази иммунопрофилактика бўлими мудири Вазира Муталова сентябрь ойининг бошида юқоридаги қарор асосида 2020 йилнинг 1 октябридан бошлаб аҳоли билан бевосита мулоқотда ишлайдиган, умумий ҳисобда бир миллиондан ортиқ тиббиёт ходимлари, мактаб ўқитувчилари, мактабгача таълим муассасалари ходимларини гриппга қарши бепул эмлаш ишларини олиб бориш белгиланганини маълум қилганди.
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)