«Рутан»нинг коронавирусга қарши таъсири маълум қилинди

Фанлар академияси ва соғлиқни сақлаш вазирлиги мутасаддилари иштирокидаги матбуот анжуманида Рутан ҳақида маълумот берилди.

Қайд этилишича, Рутан препарати антиоксидантлик ва антигипоксик хусусиятларга эга бўлиб, SARS-COV-2 вирусининг 2 та муҳим фермент тизимини ингибирлайди.

Вируснинг ҳужайрада кўпайиши ва тарқалиши ҳамда патологик ва яллиғланиш жараёнини чақирувчи оқсиллар ҳосил бўлишини тўхтатади ва касалликларда салбий ҳолат — «цитокинин бўрони»нинг олдини олади. Натижада, SARS-CoV-2 вирусига чалинган беморларнинг соғайиш муддати қисқаради ва бемор ўз ҳолатига тез қайтади.

Рутан препарати 103 та коронавирус инфекцияси билан касалланган ўртача оғирликда кечаётган беморларда қайд этилган дозада синалганда, СОVID-19 орқали чақирилган яллиғланиш жараёнининг асосий воситачиси бўлмиш С-реактив оқсили миқдорининг статистик аҳамиятли камайиши кузатилди ва бу орқали унинг аниқ яллиғланишга қарши таъсирга эга эканлиги аниқланди. Рутан қабул қилган бирон-бир беморга касаллик давомида оксигенацияга муҳтожлик бўлмади.

Рутан препаратини қабул қилган синов гуруҳи беморларини протокол даволаш фонида касалликнинг 4-5 куни давомида улардан СОVID -19 вирусига олинган ПЗР-тест таҳлили салбий бўлди.

Клиник синов натижаларига кўра, «Рутан таблеткалари, 0,1 г» №20 ўртача оғирликда кечаётган ўпка яллиғланиши 30% бўлган COVID-19 касаллигига ҳамда гриппнинг барча штаммларига қарши дори воситаси сифатида қўллаш учун рухсат этилди. «Замин»ни Telegram’да ўқинг!