Коррупцияга қарши ҳамкорлик: Ўзбекистон ва Белорусь республикалари қонунчилик ҳужжатларини коррупцияга қарши экспертизадан ўтказиш бўйича ўзаро ҳамкорлик қилади

 
Жорий йилнинг 26 май куни Адлия вазирлиги ташаббуси асосида Беларусь Республикаси Адлия вазирлиги ва Бош прокуратураси ҳузуридаги Қонунийликни мустаҳкамлаш ва ҳуқуқ-тартибот муаммолари илмий-амалий маркази ҳамкорлигида “Норматив-ҳуқуқий ҳужжатларнинг коррупцияга қарши экспертизасини ўтказиш соҳасида Ўзбекистон Республикаси ҳамда Беларусь Республикасининг тажрибаси” мавзусида вебинар ўтказилди.

Вебинарда Беларусь Республикаси адлия вазири ўринбосари Н. Филиппова, Бош прокуратураси қошидаги Илмий-амалий марказ директори В. Марчук ва ушбу марказнинг бошқа масъул ходимлари, шунингдек, Ўзбекистон Республикаси Адлия вазирлиги, Бош прокуратураси, Коррупцияга қарши курашиш агентлиги, Ички ишлар вазирлиги ҳамда бошқа вазирлик ва идораларнинг масъул шахслари иштирок этди.

Тадбирда Беларусь Республикасида коррупцияга қарши экспертиза институтининг ўзига хос хусусиятлари ҳақида батафсил маълумот берилди. Хусусан, Беларусь Республикаси Бош прокуратураси қошидаги Илмий-амалий марказнинг коррупцияга қарши экспертизадан ўтказишдаги тажрибаси муҳокама қилиниб, Беларусда коррупцияга қарши экспертиза криминологик экспертиза доирасида 2007 йил 1 октябрдан бошлаб йўлга қўйилганлиги эътироф этилди.

Марказ директори ўринбосари Олег Русецкий ўз маърузасида қонунчилик эксперт-криминологик тадқиқотларининг услубий жиҳатдан ўзига хослиги ва профилактик аҳамияти тўғрисида гапириб, криминологик ва ҳуқуқий экспертизанинг асосий усуллари ва ўзига хослиги, шунингдек криминологик экспертизанинг ҳуқуқий экспертизадан аниқ ажратишга имкон берадиган криминоген хатарларни баҳолаш мезонлари ҳақида маълумот берди.

Шунингдек, ушбу тизимнинг самарали йўлга қўйилганлиги натижасида Марказга келиб тушаётган қонунчилик ҳужжатларининг тахминан 10 % да криминоген характерга эга омиллар аниқланаётганлиги айтилди.

Вебинарда иштирокчиларга Ўзбекистонда қонунчилик ҳужжатларини коррупцияга қарши экспертизадан ўтказишнинг янги механизми, коррупцияга қарши экспертизанинг мажбурий тартиби ҳақида маълумот берилди. Хусусан, коррупциявий омилларни аниқлаш бўйича жорий йил февраль ойида қонунчилик ҳужжатларини коррупцияга қарши экспертизадан ўтказиш бўйича янги тартиб ва методика амалга киритилганлиги, натижада охирги уч ойда Адлия вазирлигида ҳуқуқий экспертизадан ўтказилган лойиҳаларнинг 17 фоизида 167 та коррупциоген омиллар аниқланишига ҳамда уларнинг бартараф этилишига эришилганлиги қайд этилди.

Бундан ташқари, амалдаги қонунчилик ҳужжатларини коррупцияга қарши экспертизадан ўтказиш тартиби жорий этилганлиги, ҳозирда вазирлик томонидан “коррупциясиз қонунчилик” лойиҳаси доирасида 20 мингдан ортиқ амалдаги қонунчилик ҳужжатларни келгуси 5 йил давомида коррупцияга қарши экспертизадан ўтказиш бўйича амалий ишлар бошланганлиги маълум қилинди.

Хусусан, жорий йилнинг ўзида адлия органлари томонидан 500 та амалдаги норматив-ҳуқуқий ҳужжатларни коррупцияга қарши экспертизадан ўтказиш режаси тасдиқланиб амалга оширилмоқда.

Шу билан бирга, вебинарда норматив-ҳуқуқий ҳужжатлар ва улар лойиҳаларини коррупцияга қарши экспертизадан ўтказиш тизимида мавжуд бўлган муаммоли ҳолатлар ва уларнинг ечими юзасидан фикрлар алмашинилиб, вебинар иштирокчиларини қизиқтирган саволларга атрофлича жавоб берилди.

Вебинар якунида томонлар, Беларусь Республикаси Адлия вазирлиги, Беларусь Республикаси Бош прокуратураси қошидаги Илмий-амалий марказ ҳамда Ўзбекистон Республикаси Адлия вазирлиги ўртасида коррупцияга қарши экспертиза соҳасида ўзаро ҳамкорликни йўлга қўйиш бўйича ишларни давом эттиришга келишиб олдилар.
  “Замин” янгиликларини “Telegram”да кузатиб боринг